Russit Qalasersuarmik piginnittoorusunnertik nittarsaateqqilerpaat
Russit ilisimatuui Qalasersuarmut siullerpaamik ilisimasassarsiornerannit ukiut 51-sit qaangiussimalerput, tamannalu pillugu russit sakkutuuvi kigaallassaaserlutik Qalasersuarmut sapaatip akunneri arlalialunnguit qaangiuppata nunninniarput.
Russit taamaaliulersaarnerat pisoqarlerneranut mianersoqqussutaasoq, ilisimannittunik nunarsuarmi tmananeersunik isumaqarfigineqarpoq. Russit sakkutuutik atorlugit issittup pisuussutaasa qanoq nunani issittoqarfiusunit agguarneqarnissaat qulakkeerniarneqarpoq. Aviisi Politiken taama allappoq.
Nunat issittunik sineriallit ataatsimiinnissaat russit sakkutuuinit pilertortumik pissasoq piumasarineqarsimavoq, ataatsimiinnermi peqataapput Kalaallit Nunaat Danmark peqatigalugu, Norge, USA, Canada aamma Rusland. Ataatsimiinnermi oqaluuserineqarpoq, Naalagaaffiit Peqatigiit, tassa FN-ip, Sikuiuvitsoq avannarleq pillugu sulinera arriippallaartoq.
- FN-i taama arriitsigisumik suliniarpat, aatsaat ukiut 30-niik 50-t qaangiuppata nunanit piumasaqaatigineqartut isummerfigineqartussaapput. Taama sivisutigisumik utaqqisoqarsinnaanngilaq, taamaattumik sulineq sivikinnerusariaqarpoq, danskit inatsiseqarnermut naalakkersuisuat, Lars Barfoed aviisimut Politikenimut oqarpoq.
Geologial Survey-ip nalunaarusiaani allassimavoq, ilimagineqartoq nunarsuup avannaarpiarsua nappartanik 90 milliardinik amerlassuseqartunik uuliaqartoq. taakkunanngalu nunarsuaq tamakkerlugu ukiuni pigasuni pilersorneqarsinnaasoq. Uuliap saniatigut 47.000 kubikmeterimik gasseqarfeqartoq ilimagineqarpoq, nappartat 44 milliardit gassimik immerneqarsinnaasut ilimagineqarluni, nunarsuarmi gasseqarfiit pingajorarterutaat nunarsuup avannaarpiarsuaniittoq aamma ilimagineqarpoq.
Paggatassat naammattut. Pisuussutit ilaat ima nunamut qanitsigaat, taakku aalajangerneqareerlutik nunanit kikkunnit pigineqarnerannit. Nunap toqqavii immap naqqaniittut nunanit tallimaasuni arlalinnit toqqavigineqarneri aaqqiagiinngissutaapput. Aaqqiagiinnginnerlu FN-ip ataatsimiititaliaanit isummerfigineqartussaavoq, tassalu ataatsimiititaliaq taanna nunanit issittumi sinieriallit tallimaasunit arriissorineqartoq.
Sulinerup qanoq pitsanngorsarnissaa siunertaralugu, nunat taakku tallimat isumaqatigiissutigaat, nunanit taakkunanngaanneersunit atorfilittanit misissorneqassasoq. Aamma isumaqatigiissutigineqarpoq aaqqiagiinnginneq toqqissisimasumik aaqqinneqartariaqartoq. Taamaakkaluartoq tassa Rusland sakkutuuni atorlugit arlaleriarluni nukissorpoq. Naapeqatigiinnissamut ullut aqqaneq marluinnanngortut, Ruslandip præsidentia Medvedev, nalunaarpoq, Rusland sakkortuuliorluni issittumi pigisorisaminnik illersuiniartoq.
Tassalu sapaatip akunneri arlaqanngitsut qaangiuppata russit sakkutuui kigaallassaaserlutik Qalasersuarmut avannarlermut nunnigussaanialerput.
Nunat issittuni sineriallit ataatsimiinnerminni aamma isumaqatigiissutigaat, sumiiffiit assortuussutaasut nalagaaffiit eqqartuussiviannit Haagimiittumi assortuunnerit aalajangerneqartassasut.
