Russit Qalasersuaq killeqarfimminni ilanngukkusuppaat

- Rusland piaarnerpaamik inatsisiliussaaq, taamaalilluni nunap killeqarfiani Qalasersuaq ilanngunneqarniassammat, russit præsidentiat Dmitrij Medvedev ullumi taama oqarpoq.
Allattoq Elisa Isaksen
septembarip 17-at 2008 17:14

- Ruslandip Issittumi killeqarfilernissaanut tunngasumik naalagaaffittut inatsisiliortariaqarpugut. Tamannami kinguaassatsinnut tunngatillugu akisussaaffigaarput. Taamaalillutami Ruslandip Issittumi soqutigisai qulakkeersinnaassagatsigik, præsidenti isumannaatsuunissaq pillugu siunnersuisoqatigiit Moskvami ataatsimiinneranni oqarpoq.

Ruslandip ullumikkut taama nalunaaruteqarnermigut Qalasersualerngusaanneq ikummarissaqqippaa. Tamanna Issittumi nunat tallimat peqataaffigisaanik Ilulissani maajimi ataatsimiittoqarneratigut – Ruslandip peqataaffigisaatigut – Naalagaaffinnit Peqatigiinnit 2014-imi aalajangiiffigineqartussanngorlugu isumaqatigiissuteqarfigineqaraluarpoq.

Taamanimiit Ruslandip sakkutuuni Issittumiittut amerlisimavai “Issittumilu soqutigisami illersornissaat” piareersimaffigilerlugu.

Avatangiisinik illersuiniaqatigiit Issittumi pisuussutinik atuipilulernissaq mianersoqqussutigaat Qalasersuullu tamakkerluni aatsitassarsiorfingortinneqarneratigut avatangiisit pillugit ajornartorsiulernissaq mianersoqqussutigalugu.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq