Russit qaartartuliorfianni qaartoortoqarmat arlallit ajunaarput

Moskva-miit kujammut-kangimut 200 kilometerinik ungasitsigisumi suliffissuarmi qaartoortoqarnerani inuit 16-it missaat ajunaarput.
Suliffissuaq tallimanngornermi ullaakkut ikuallalerpoq, uanilu qatseisartut silataaniittut takussaapput. Inuit 16-it pallillugit ajunaarsimapput.Ass.: Russia''s Emergencies Ministry/Reuters Assi © : Russia''s Emergencies Ministry/Reuters
Allattoq Ritzau
oktobarip 22-at 2021 12:05

Ruslandip kippasinnerusortaani suliffissuarmi ilaatigut qaartartuliorfiusumi tallinganngornermi qaartoortoqarnerani inuit arlallit ajunaarput.

Tusagassiorfiit arlallit taamatut allaaserinnipput.

Moskva-miit kujammut-kangimut 200 kilometerinik ungasitsigisumi, illoqarfiup Ryazan-ip eqqaani qaartoorneq pivoq.

Ryazan-imi nunap immikkoortortaani naalakkersuisut AFP naapertorlugu nalunaarput, "inuit 15-init ajunaarsimasut ataaserlu annertuumik uutitersimasoq". Uutitersimasoq peruluppoq.

Russit tusagassiorfiata Tass-ip kinaaneranik oqaatigineqanngitsoq issuarlugu nalunaarput, inuit 16-it ajunaarsimasut.

- Nalunaarutit kingulliit naapertorlugit qaartoornermi inuit 16-it ajunaarput. Annaassinia inuit 12-it timaat nassaarisimavaat, sisamallu suli nassaarineqanngitsut, taanna russit tusagassiorfiannut oqarsimaneragaavoq.

Ajutoorneq suliffissuarmi pivoq, tassani ilaatigut suliffissuaqarnermut atatillugu sakkutuujunngitsunut qaartartuliortarfiuvoq, illersornissaqarfimmut qaartartuliortarfiulluni kiisalu aqqartartunut gasgenerator-inik pilersuisuulluni. AFP naapertorlugu, suliffissuaq nittartakkamini taamatut allappoq.

Annaassiniat 170-it qaartoorfiliartinneqarput. Pinartumik pisoqarnissaanut ministereqarfik taamatut nalunaarpoq.

Tallimanngornermi sumiiffimmi nalunaaqutaq 08.22, ikuallattoq pillugu ministereqarfik kalerrinneqaarpoq.