Russit pillugit oqaatsit sakkortupput

Allattoq Najaaraq Egede
aggustip 03-at 2007 10:49

Qalasersuup imaata naqqanut ilisimasassarsiorneq naammassereersoq Ruslandimi nuannaarutigineqaqaaq. Taamaattorli ilisimasassarsiorneq nunanit Qalasersuarmik soqutiginnittunit nuannaarutigineqarpallaanngilaq, tassa USA-mit, Canadamit, Norgimit Danmarkimillu.

Issittoq pillugu oqallinnermi oqaatsit sakkortuut atorneqartarput maannalu Canadami ilisimatusartoq nunanut kajumissaarivoq ajornartorsiutit piffissami qaninnerpaami oqaloqatigiissutigeqqullugit.

- Nunat Qalasersuarmut qaninnerpaat ataatsimoorlutik ataatsimeersuartariaqaraluarput, tassanilu oqaluuseralugu issittumi pisinnaatitaaffiit, taama oqarpoq Canadamiu Michael Byers, taanna University of British Columbia-mi naalakkersuinikkut ilisimatusartuuvoq ataqqineqartoq.

Taama oqaaseqarpoq ippassaq Qalasersuup imartaani russit erfalasuleereersullu aamma Canadamiut ministeriunerata Stephen Harperip Sullualummi sakkutuuliinissamut pilersaarumminik oqaaseqareersorlu.

- Illuatungeriit kajumissaarniarpakka naalakkersuinikkut sakkortuuliorlutik oqaaseqartarnertik sakkukilliseqqullugu aamma ingerlariaqqiffissaqanngitsumik aporaakkunnaaqqullugit, tamatumunnga taarsiullugu naalagaaffiit akunnerminni oqaloqatigiittariaqarput, Michael Byers ullumi Nunatsiaq News-imut taama oqarpoq.

Taanna isumaqarpoq Canadamiut russillu politikeriisa issittoq qinersisartunut qujanarniutigigaat, naak qinersisartut issittoq ilisimasaqarfiginngikkaluaraat.

Michael Byersip siunnersuutigaa ataatsimeersuarneq Issittumi Siunnersuisoqatigiit ataani ingerlanneqassasoq, tassami taamaalilluni naggueqatigiit Inuit pineqartoq pillugu tusaaniarneqarniassammata.

Mary Simonip Inuit Tapiriit Kanatameersup issittumi ataatsimeersuarnissaq ilassilluarpaa, tassa issittumi nunallit isumaqatigiinniarnermi pimoorussamik ilaatinneqassappata, Mary Simon Nunatsiaq News-imut ullumi taama oqarpoq.

Tartupaluk pillugu sanngiissuserput takutikkaluarutsigu Beaufortip Imartaanut tunngatillugu oqallinnermi amerikamiut aamma taamaassorissavaatigut, nunallu toqqaviisa killingi sumut killiffeqarnersut pillugit russit isumaqatigiinniarusuttutut isumaqarfigissavaatigut.

Taamatut nipilimmik oqaloqatigiinneq Michael Byersip mianersoqqussutigaa.

- Oqaloqatigiinneq maanna aallartinngippat aaqqiagiinnginneq sakkortuneruliinnassaaq, oqarpoq.