Russit nuannattut nunat allat uparuaapput

Allattoq Najaaraq Egede
aggustip 03-at 2007 05:32

Qalasersuarmut russit aqqartartuata apuunnera russit tusagassiorfiinit nuannaarutaaqisoq, USA, Canada, Danmark Norgelu kusanarpallaanngitsunik russinut isiginnittunik allaaserisaqarput.

- Qalasersuarmi immap naqqani russit erfalasuliiniarnerat ullutsinni atorsinnaanngilaq akuerineqarsinnaananilu, Norge, USA, Canada og Danmarkilu Kalaallit Nunaat sinnerlugu oqarput.

- Ukiut 1400-kkut atuukkunnaareerput, taamanikkummi nunassarsiorlutik nuna tikitartik erfalasuleraangamikku isumaqartarput pigilerlugu, ullumikkulli pissutsit allaapput, Canadami nunanut allanut ministeri Peter MacKay oqarpoq, russit nittarsaakkusuinnarlutik pissusilersornerarlugit.

Amerikamiut oqaaseqartitaat Tom Casey oqarpoq, russit immap naqqani erfalasumik qalipaataanik qalipaatilersuigaluarunilluunniit pissutsinik allanngortitsisoqarnavianngitsoq.

Danmarkimi nunanut allanut ministereqarfimmiut aamma taama isumaqarput.

- Erfalasuliineq politikkikkut oqariartorneruginnarpoq, kisianni sumilluunniit qalasersuarmik piginnittuulersitsisussatut inatsisitigut tunngavissaqanngilaq, ambassadør Peter Taksøe-Jensen, nunanut allanut ministereqarfimmi inatsisilerinermut immikkoortortami pisortaq oqarpoq.

Russit nuannaarnerat killeqanngilaq. Allannngilaq ulloriarsuarmut Marsimut nunnissimaannallartut, nutaarsiassaqartitsivik Ritzau allappoq.

-Ruslandip issittumi pisuussut uulia piniarlugu sorsuleruttorpoq, aviisi Vremja Novosti saqqamini ullumi saqqummersumi allappoq.

Oqartussat aviisiat Rossijskaja Gaseta isumaqarpoq, russit nunarsuarmi killeqarfinnik allanngortitsilluinnalersut.

Naalagaaffiit Peqatigiit immami killeqarfiit pillugit ataatsimiititaliaata siusinnerpaamik 2014-imi aalajangersinnaavaa Qalasersuaq, Nordpoli nunamut sorlermut atanersoq.