Russit Issittumi takornariartitsineq ineriartorteqqinniaraat
Umiarsuit takornariartaatit avatangiisinik mianerinnillutik angallassisinnaasut, Issittumilu ilisimasassarsiorniat periarfissaat pingaarnertut ineriartortinniarneqarput. Asia Times nittartakkamini taama allaaserisaqarpoq.
Ruslandimi nuna eqqissisimatitat annerpaat Russian Arctic takornarianit aasaq manna ornigarluarneqarsimavoq, qeqertat marluk Novaya Semlja Franz Josef Landilu onrigarluarneqarsimallutik. Tassami takornariat 20 procentinik amerlisimapput.
- Russian Arctic takornarianit nunanit 36-neersunit ukioq manna tikinneqarpoq, amerlanerillu Kinaminngaanneersuupput, Alexander Feldt, Russian Arctic national Parkimeersoq oqarpoq.
Ruslandip Issittortaanut takornariat Ruslandimeersut aamma amerleriarsimapput, soorlu takornariati Schweizimeersut, Taiwanimeersut Frankrigimeersullu amerleriarsimasut. Takornariat amerlanerit umiarsuaq takornariartaat Sea Spirit, Frankrigimiunit Grands Espacesimit pigineqartoq, aqqutigalugu Ruslandip Issittortaanut takornariarsimapput.
Ruslandip Issittortaa katillugu 3,6 millionit kvadratkilometerinik angissuseqarpoq, qeqertallu assigiinngitsut katillugit 185.000 kvadratkilometeriullutik.
Ruslandip Issittortaani takornariartitsinerup ineriartortinneqarnissaanut aningaasaliissutissat 76 millionit dollariussapput, tassa 478 millionit koruunit missaat. Ruslandip Issittortaanut takornariartitsisarnerup ineriartortinneqarnissaanut pilersaarut 2019-imit 2025-p tungaanut ingerlavoq.
