Ruslandip præsidentiata Vladimir Putinip sakkutuut 300.000-t sorsunnissamut piareersimanissaannut peqqussuteqareernerata kingorna akerliussutsimik takutitsinerit imaaginnavissimapput.Assi: Olga Maltseva/AFP/Ritzau Scanpix

Russit innuttaasunik naqisimanninnerulerput

Ruslandimi inuit 1000-nit amerlanerusut illoqarfinni arlalinni akerliussutsimik takutitsinerpassuit kingorna tigusarineqarput.

Ruslandip innuttaasunik naqisimanninnera 2012-imili sakkortusiartuinnavissimavoq, Ukrainellu februaarip naalerneraniilli saassunneqarnerani aatsaat taama sakkortutigaluni.

Europami nunat sillimanissamut suleqatigiiffiata OSCE-p nalunaarusiaani tamanna takussutissarsineqarpoq. Nutaarsiassaqartitsivik AFP taama allappoq.

Ruslandimi naalakkersuisut inatsisinik nutaanik assigiinngitsunik atuutilersitsinermikkut innuttaasut ersiortitaasutut qunusiarineqartutullu misigisimalersut, suleqatigiiffiup nalunaarusiaani ilaatigut inerniliunneqarpoq. Assersuutigalugu tusagassiortut ilungersuutigisamillu ingerlatsisut suliaat killilersorneqarnerulersimapput.

Tusagassiortut, ilungersuutigisamillu ingerlatsisut tamanna pillugu Ruslandimit aallarsimapput.

AAMMA ATUARUK Ruslandimi akerliussutsimik takutitsisut 1300-t tigusaasut

Ruslandip Ukraine februaarip naalernerani saassummaguli OSCE pingajussaa nalunaarusiorpoq. Nalunaarusiat siulliit marluk Ukrainemut tunnganerupput, Ruslandimi nunat tamalaat ikiorsiisarnermut inatsisaannik unioqqutitsisoq Ukrainep oqaatigimmagu.

OSCE-p nalunaarusiani Ruslandimi illoqarfinni arlalinni akerliussutsimik takutitsinerpassuit kingorna saqqummiuppaa. Inuit 1000-nit amerlanerusut akerliussutsimik takutitsinerni taakkunani tigusarineqarput.

Ruslandip præsidentiata Vladimir Putinip sakkutuut 300.000-t sorsunnissamut piareersimanissaannut peqqussuteqareernerata kingorna akerliussutsimik takutitsinerit imaaginnavissimapput.

Sorsunnersuup kingulliup kingorna Ruslandimi sakkutuut sorsunnissamut aatsaat piareersimatinneqarnialerput, Ukrainemilu sorsuttoqalernerata sakkortusiartorneranik tamanna takussutissaalluni.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl