Russit eqqoriaanerat upperivallaanngilaat
Silaannaap kissakkiartornera, nunarsuarmilu sermersuit aakkiartorneri, ullut tamarluinnaasa aviisit saqqaanni allaaserineqartarput. Taamaakkaluartoq russit ilisimatuui isumaqarput, silaannaq kissakkiartorunnaalersoq, paarlattuanillu sermersuaqarnerata nalaanisulli issileriartulersoq.
- Ukiuni makkunani nillertikkiartornera malugilereerparput ukiullu 50-it qaangiuppata sermersuaqarnerata nalaanisulli nillertigilernissaa ilimagaarput, Sankt Petersborgimi ilisimatusarfimmi russit ilisimatuui taama oqarput.
1645-miit 1715-ip tungaanut sermersuaqarnerata nalaanisulli nillertigilernissaa taakku eqqoriarpaat. Sermersuaqarnerata nalaani Hollandimi tatsit tamarmik sikusimasut sukuutserfigineqartarput. Taamanikkut issileruttornerata nalaani qallunaatsiaat Kalaallit Nunaaniit nuussimanissaat ilimagineqartarpoq.
Seqernup qinngorneri ukiut 100-t qaangiukkaangata ikilisarput tamatumalu kingunerisaanik nunarsuatsinni nillernerulertarpoq. Seqernup qinngornerisa ikiliartulernerat nillertikkiartulernissaanik eqqoriaanermut tunngaviuvoq.
- Nunarsuarmi immat assigiinngitsut nillertikkiartulersimasut ukiuni kingullerni pingasuni misissuinitsinni uppernarsivarput. 2012-p '15-illu akornanni nunarsuatsinni silaannaap nillertikkiartulernissaa eqqoriarparput. Aatsaallu 2200-kkut ingerlaneranni kissakkiartuleqqinnissaa aamma eqqoriarparput, russit ilisimatusartut pisortaat russit tusagassiorfiannut taama oqarpoq nangillunilu:
- Taamaattumik ikummatissat silaannarmik mingutitsisut ikilisarneqarnissaanik anguniagaqarneq Kyotomilu isumaqatigiissummi malittarisassat pimooruterujussuartariaqanngilagut, russit ilisimatuuisa pisortaat oqarpoq.
Danmarkimi silasiorfimmi silaannaap pissusaanik ilisimatusarfimmi pisortap Jens Hesselbjerg Christensenip russit eqqoriaanerat upperivallaanngilaa. Seqernup qinngornerisa nunarsuatsinni silaannaap nillissusaanut sunniuteqartarneri russinit tunngavilersuutigineqartut taassuma tunngavissaqarsorinngilai eqqoriaanerli soqutiginartutut isigalugu.
