Russit: Dansk Flygtningehjælp kilitsissiaavoq

decembarip 19-at 2006 16:58

Russit isumannaatsuunissamut ingerlatsivianni pisortap Dansk Flygtningehjælp kilitsissiatut sulisimanerarlugu ullumi pisuutippaa. Dansk Flygtningehjælp Tjetjeniami sorsuttoqarnerata kinguneranik qimaasunut aaqqissuussamik ikiuiniartuni annersaavoq. Ikiuiniaqatigiiffik ilaatigut pisuutinneqarpoq akerlilersuiniartunut ikiuiniarnissamik naalakkiisimanerarlugu.

Inuit aqqinik uppernarsaatissanilluunniit allanik, soorlu assinik saqqummiussisoqanngilaq. Naak Russit nunani allamiut kilitsissiaat unnerluutigigaangamikkik taamaaliortaraluartut.

Tusagassiortunik katersortitsinermi inuit ataasiakkaat pineqanngillat, soorlu oqaatigineqarpoq Russit isumannaatsuunissamik ingerlatsiviannit peqqarniisaaniarnermik aaqqissuussinerit 300-t pinngitsoortinneqarsimasut. Taamaattorli Dansk Flygtningehjælp aamma ikiuiniaqatigiiffiit ataasiakkaat allat taaneqarput nunaminni kilitsissiaqarfimminnut ikiuussimanerarlugit.

Kisianni Russit kilitsissiaqarfiata Dansk Flygtningehjælpimik unnerluussinissaa ilimagineqanngilaq.

Aaqqiagiinngittoqartarpoq, aamma inuit ataasiakkaat Ruslandimut iseqqusaajunnaarsinnaapput. Taamaattorli Dansk Flygtningehjælp assersuutitut atorneqarpoq, matumani oqariartuutigineqarluni nunat allamiut suliniaqatigiiffii tatigineqarsinnaanngitsut.

Russit naalakkersuisui isumaqarunarput suliniaqatigiiffiit taamaattut aggeqquneqarsimanngisaannarlutik suliniartut qanorluunniit oqarsinnaatitaallutillu iliorsinnaasut nunamiit anisinneqartariaqartut.

Poul F. Hansen Moskvamiit taama nalunaarpoq.