Russit aqqartartui issittup imartaaniittarnerarpaat
Aqqartartut Canadap imartaani susunukua? Aamma Amerikamiut aqqartartui issittup imartaani Sullualummilu sapaatip-akunneri marluk matuma siornagut takuneqartut susunukua? Taama Canadamiut aperaat.
Maanna aamma tusarsaalerpoq russit aqqartartui issittup imartaani takuneqartalersut. Ilumoorsimassappat aqqartartut aamma Kalaallit Nunaata imartaatigoortarsimassapput.
Canadami naalakkersuisut illersornissamut ataatsimiititaliamit piumaffigineqarput aqqartartut pillugit russit aallartitaqarfiat nassuiaatissagaat.
Kisianni nassuiaassanersut qularnarpoq, soorlu ataatsimiititalimi ilaasortat ilaat Laurie Hawn oqartoq: Aqqartartumik angalasut sumunnarnerlutik oqaatigineq ajorpaat. Aqqartartut suneri isertuussaalluinnartarput, kisianni piniartut takusaat upperigamikkit illersornissamut ataatsimiititaliaq nassuiaaqqusivoq.
Ruslandip issittumi aqqartartunik angalatitaqartarnermut politikkia sunarpiaanersoq Canadami illersornissamut ataatsimiititaliap ilaasortaasa aamma tusarusuppaat.
Misissortinniarpaattaaq russit sorsuutaat timmisartut Canadap issittortaanik qanoq qulaavaasarsimatiginersut, tassami russit timmisartui qaartartunik nakkaatitsisartut marluk Canadap killeqarfianut qanittukkut ima qanillitigisimapput, allaat Canadap sakkutuuisa timmisartui qimagutitsiniarlutik aallartinneqartariaqarsimallutik.
Canada russinit paasissutissinneqarusuppoq.
Silap pissusaata allanngoriartornerata kingunerisaanik issittumi siku aakkiartupiloorpoq, taamaammat issittumi sikup aalaakkaasup milliartornerata kingunerisaanik Canada avannaqqullugu umiarsuarnik angalasalernissap ammaanneqarnissaa nunanit tamalaanit soqutigineqaqaaq. Canadami oqartussat nunartik avannaqqunneqassappat namminneq oqartussaaffigerusuppaat. Aamma tusartaannarparput qalasersuaq nunamut sorlermut atanersoq assut paaserusunneqartoq.
Marianne Stenbæk-ip Montreal Canadamit ilanngutassiivoq.
