Russit aningaasaatilissuit aningaasaat pigisaallu nalillit tigusiffigeqqusaanngitsullu Ukrainep, sorsunnermik eqqorneqarnerlussimaqisup sanaqqinneqarnissaanut atorneqarsinnaanersut EU-p misissuleruttorpaa.

EU-Kommissionip siulittaasua Ursula von der Leyen Tysklandimi tv-qarfiit ilaannut ZDF-imut taama oqarpoq.

- Aningaasaatilissuit pigisaasa nalillit Ukrainep sanaqqinneqarnissaanut atorneqarsinnaanersut inatsisilerituutta misissoqqissaaleruttorpaat. Rusland aamma ikiuisariaqarpoq, von der Leyen oqarpoq.

AAMMA ATUARUK EU-p uuliamik suli akuiagaanngitsumik Ruslandimit eqqussuinini unitsinniaraa

Nunat killiit Ruslandip Ukrainemik saassussinera pissutaalluni, russit aningaasaatilissuit pigisaat nalillit tigusiffigeqqusaajunnaarsippaat. Assersuutigalugu aningaasat uninngasuutitat pigisallu nalillit tigusiffigeqqusaajunnaarsinneqarlutik.

Ukrainemi sorsuttoqarnerani aseruatiternerit nalingi maannamut naatsorsorneqarsinnaanngillat.

AAMMA ATUARUK EU Ruslandimut nutaamik kinguneqartitsinermi mattussinissanik piareertitaqartoq

Qaartartumeerinerilli russillu sakkutuuisa iliuuserisaat pissutaallutik aseruatiternerit ikinnerpaamik 500 milliardit dollarinik naleqartut Frankrigimi aviisit ilaata Le Mondep allaaseraa. Tassa 3500 milliardit koruunit missaat.

Nunap attaveqaatitigut atortulersugaanera, soorlu aqquserngit, ikaartarfiit, innaallagissiorfiit, erngup nukinganik nukissiorfiit, kloakit qimuttuitsullu aqqutaat taakkununnga ilaapput.