Russit aallartitaat tuluit nunaanniit anisinniarlugit siorasaarneqarput

Allattoq Jaaku Lyberth
juulip 16-at 2007 17:06

Tuluit naalakkersuisuisa russit naalagaaffimmit piginnaaneqartitaallutik aallartitat sisamat tuluit nunaaniit anisinniarlugit siorasaarisimapput, taamaaliornermikkut akerliunertik takutinniarpaat Ruslandip siornatigut nunanut allanut tunngatillugu kilitsissiaq Londonimi toqutsisimanermut atatillugu eqqartuunneqarnissaanut tunniukkumanngimmagu. Tuluit nunanut allanut ministeriat David Miliband tiimialunnguit martuma siuninnguatigut taamatut Tuluit Nunaanit russit naalagaaffianik aallartitanik anisitsinissamik ilisimatitsivoq.

Tuluit nunanut allanut ministerertaavata David Milibandip, naalagaaffimmit piginnaaneqartitaallutik allartitanut tunngatillugu ersarissumik tulleriiaarluakkanik oqaaseqarnermini oqaatigaa

Siullertut Londonimi russit naalagaaffimmit piginnaaneqartitaallutik aallartitaat anisineqassasut.

Aappaatut suliniutissanik pilersaarutit allat maannakkut ingerlanneqartut nalilersoqqittariaqarpavut, ilaatigut kinaassutsimik allagartaq tunniunneqartartoq naqissusigaalluni atortussanngortinneqartartoq sukkanerusumik pineqarsinnaaleqqullugu.

Pingajuattut russit kilitsissiaat Andrei Lugovoi-p Tuluit Nunaanit ujaarineqartup sukkulluunniit nunanut allanut tummaraluarpat tigusarineqarluni Tuluit Nunaanut tunniunneqarnissaa piumasaraarput, taama oqarpoq, David Miliband.

Tuluit Andrei Lugovoi pasivaat, russit kilitsissiarisimasaanik killuusisuusumik Alexander Litvinenko-mik siorna ukiaagaa toqutsisimasutut.

Radiop qinngorneri toqunartullit atorlugit toqutsineq pisimavoq. Tuluit nunanut allanut ministeriata oqarnera malillugu, Andrei Lugovoip toqunartuliinermini Hotelimi tekande atorsimavaa tamatumalu saniatigut timmisartumi Londonimiit Moskvaliartaammi radiup qinngorneri ulorianartut nassaarineqarsimapput.

Tuluit nunanut allanut ministeriata ersarissumik oqaatigaa, Tuluit Russillu akunnerminni aallartitaqarnikkut aningaasaqarnikkullu attaveqaqatigiinnerat pitsaalluinnaraluartoq allatut ajornartumik saaffiginnissutit qisuariarfigineqartariaqartut.

Unnerluussineq arlaannaanulluunniit atuumassuteqartanngitsoq Europami ingerlattarparput tamannalu aamma russinit ilikkarneqartariaqarpoq, toqutsinermi nunami pineqartumi pisimagaagat suliassartaa nunami toqutsiffiusumi suliarineqartartussaavoq. Underhusemi tuluit nunaanni innutaasut qinigaat, David Miliband, taama oqarpoq.

Russit oqaatigereersimavaat saaffiginnissut akissuteqarfigissallugu, ilimanarporli Tuluit naalagaaffiannit piginnaatitaallutik aallartitaat Ruslandimiit anisinneqassasut.