Nunanit allanit

Russit ministeriata Norge qinngasaaraa

Ruslandip Krimip qeqertaasartaanik tiguaaneranut atatillugu pillaatitut iliuuserineqartunut atatillugu Norgep aamma EU-p allattorsimaffiutaanni inunnut isersinnaanissamut akuerisaanngitsunut Ruslandip ministeriunerata tullia Dmitrij Rogozin akornanniippoq.

Allattoq Camilla Dam

apriilip 21-at 2015 10:03

Nutserisoq Elisa Isaksen

Norgelli qeqertaataanni Svalbardimi arfininngormat tikeraarami tamanna soqutigivallaanngilaa, tamaaniinninilu qarasaasiatigut attaveqaqatigiittarfikkut Twitterikkut nuannaarluni malugeequsaarlugu.

Twitterimi ilaatigut assit inississimasai tassaallutik Svalbardimi illoqarfimmut Longyearbyenimut apuunnermini assini, Russillu aatsitassarsiorfiannut Barentsburgimut qeqertami allamiittumut kingusinnerusukkut pulaarnini Twitterimi oqaluttuaraa.

Ruslandip ministeriunerata tulliata Svalbard nalunaaquttap akunnerini arfinilinni tikeraareerlugu qimappaa Qalasersuarmilu Russit issittumi misissuisarfittaavannut ingerlaqqilluni.

- Issittumi najuutilereernerput attatiinnassavarput, aamma pigisarilissavarput, Dmitrij Rogozin nittartakkamit nrk.no-mit taama issuarneqarpoq.

Aamma atuaruk Issittup imartaanik piginnittuulernissamik Danmark piumasaqaateqartoq

Dmitrij Rogozinip naatsorsuutigineqanngitsumik Svalbardimiinnera Norgemi oqartussat Ruslandimi oqartussanut nassuiaateqarfigeqqummassuk, oqaaseqartartup Alexander Lukashevichip, Russit nunanut allanut tunngasunut ministereqarfiat sinnerlugu oqaaseqarfigaa.

- Ministeriunerup tulliata Svalbardimut tikeraarnera tupaallaatigineqarpoq, naak Parisimi isumaqatigiissut ukiunik 100-ngajannik pisoqaassusilik naapertorlugu nunani atsioqataasimasuni innuttaasut qeqertani Svalbardini inuussutissarsiutitaarsinnaanermik, aallaaniarsinnaanermik aalisarsinnaanermillu pisinnaatitaaffeqartut, Russit nutaarsiassaqartitsiviannit TASS-imit taama issuarneqarpoq.