Russimik tusagassiortumik toqutaasoqaqqippoq

Russeq tusagassiortoq Natalja Estemirova, Kaukasussip Avannaani ukiorpassuarni politiit isertortumillu paasiniaasartut aallarussisarnerannik, anniartitsisarnerannik toqutsisarnerannillu tusagassiisarnermigut qulaajaasartoq, ullaaq manna aallarunneqarpoq peqqarniitsumillu toqunneqarluni.
Allattoq Elisa Isaksen
juulip 15-at 2009 13:51

Tusagassiortoq taanna Ruslandip ilaani Ingusjetiami orpippassuit akornanni anniartinneqarsimasoq pukusuagullu marloriarlugu aallaallugu toqunneqarsimasoq nassaarineqarpoq. Tusagassiorfik Itar-TASS taama paasissutissiivoq.

Natalja qaammatini kingullerni Ruslandimi inuit pisinnaatitaaffii pillugit suliniaqatigiiffimmi Memorialimi sulivoq, politikerillu pissaanermik tigumminnittut pinerluutaat, ilaatigut pisortat pillaallutik toqutsisarneri isertortumillu pillaalluni toqutsisarnerit tassani misissorneqartarput. Soorlu niviarsissamik 20-nik ukiulimmik taassumalu ilaqutaanik politeerpaaluit toqutsisimasut Natalja Estemirovap ippassaaniinnannguaq paasivai.

Natalja inuit pisinnaatitaaffiinik tusagassiorluni suliaqarnerminik EU-Parlamentimit nersorniarneqarpoq, 2007-imilu ataqqinaataasumik Politkovskajamik akissarsitinneqarpoq, taanna tusagassiorluni qulaajaanermut nersorinnissutaavoq.