Ruslandip umiarsuit arsaarinnissutigisimasani Ukrainemut utertinniarai
Ukrainemiut umiarsuaat Ruslandimit ukiup ataatsip matuma siornatigut arsaarinnissutigineqartut Ukrainemut maanna utertinneqarput.
Nunat taakku marluk akornanni aaqqiagiinngissutit taamaalinikkut aaqqiivigiartuaarneqarput.
Ruslandimi nutaarsiassaqartitsivik Interfax sapaammi taama allaaserisaqarpoq.
Ukrainemiut umiarsuaat Ruslandimit siorna novembarimi arsaarinnissutigineqartut tassaapput umiarsuit sorsuutit marluk kalittaallu.
Umiartortut Ukrainemiut 24-t taassuma saniatigut tigusarineqarput.
Ukrainemiut umiartortut iperagaasut
Taakku parnaarussanik paarlaasseqatigiinnikkut ukioq manna septembarimi iperagaapput, nunat taakku marluk akornanni pissutsit pitsanngoriartornerannik tamanna nalilerneqarluni.
Ukrainep pigisaa Krimip qeqertaasaa, Ruslandimit 2014-imi arsaarinnissutigineqarmalli nunat taakku akornanni pissutsit aaqqiagiinngissuteqartoqalerpoq. Ukrainep Ruslandillu aaqqiagiinngissuteqarnerat inuit 13.000-it missaat toqutaanerannik maannamut kinguneqarpoq.
Ukrainep sakkutuui immikkoorniallu russinik tapersersortillit sorsuffimmi sumiiffinnit pingaarutilinnit oktpbarimili tunuarput.
Frankrig, Tyskland, Rusland Ukrainelu Parisimi decembarip ulluisa qulingiluaanni ataatsimeeqatigiissasut, Frankrigip tallimanngormat nalunaarutigaa. Ukrainep kangisissuani aaqqiagiinngissutit aaqqiiviginissaannut periusissat eqqartussavaat.
