Ruslandip sorsunnersuit pingajuata aallartinnissaa aarleqqutigaa
Ruslandip Nato pisuutippaa Ukrainemi sorsunneq pillugu annertusaasutut.
Tassami russit nuinanut allanut ministeriat Sergej Lavrov naapertorlugu Nato piviusumik sorsunnermut akuuvoq, naak illersoqatigiit sakkutuunik sakkunilluunniit ilanngussinngikkaluartut.
Nunarpassuit Nato-mut ilaasortaasut, Danmark taakkununnga ilaalluni, Ukrainemut sakkunik nassiussereerput.
Lavrov-ip aamma sioorassaarutigaa sorsunnersuit pingajuata aallartinnissaa ”piviusumik” periaannaasoq.
Isumaqarpoq Ukraine sorsunnersuit pingajuannik aallarniinissamut pissutaasinnaasoq. Tassagooq nunani eqqissinissaq pillugu oqaloqatigiinnerit iluatsinngitsoornerannut Ukraine pisuummat.
Russit tusagassiorfiinit apersorneqarnermini taama oqarpoq, tusagassiuutit AP, AFP aamma Reuters naapertorlugit.
USA Natomilu ilii oqarput Ukrainemi sorsunnermi toqqaannartumik sakkutooqarnikkut akiuliunniarnatik. Tamatumunnga pissutaavoq sorsunnersuit pingajuannik aallarniinissamut ulorianartorsiorneq pinngitsoorniaramikku.
Lavrovip nalunaarutaa takkuppoq Tysklandimi amerikamiut timmisartortartunik sakkutooqarfiannni Ramstein Air Base-mi marlunngornermi ataatsimiinngilaarnermi.
Nunanit iligiinnit 40-nit illersornissamut ministerit illersornissaqarfinnullu naalakkat qullerpaat Ukrainemik tapersersuisut nunamut ikiuutisaanik oqaloqataigiiinniarlutik naapipput.
Lavrov isumaqarpoq “annertuumik” ulorianaateqartoq akerleriinneq atomip nukinganik sakkulersorluni sorsuunninngorsinnanera. Sapaatip akunnera kingulleq oqarpoq Rusland atomip nukinganik sakkut atorlugit sorsunneq pinngitsoorniaraa.
Ukrainep nunanut allanut ministeriata Dmytro Kuleba-p russit nalunaarnerat ersiutitut isigaa Ruslandip "silarsuarmiut Ukrainemik tapersersuinissaannut annilaangatilerniarnerinut neriuut kingulleq” annaasimagaa.
- Sorsunnersuit pingajuannik aallarniisnissamut “ilumoortumik” aarlerinartorsionermik oqalunneq isumaqaannarpoq Moskvap Ukrainemi ajorsarnini malugigaa, inuit attaveqaqatigiittarfianni Twitterimi allappoq.
Nunamik sakkutuuliinerup 24. februaarimi aallartinnerata aqaguani russit præsidentiata Vladimir Putinip sakkutuuni atomip nukinganik sakkunut akisussaasut naalakkerpai upalungaarsimaqqullugit.
