Ruslandip Norgellu nunap inoqqaavi suleqatigiissutigissavaat
Norgemiut imartamut Barent-imut allaffeqarfiat aamma Ruslandimi nunap inoqqaavisa kattuffiat Raipon, nunap inoqqaavi pillugit suleqatigiinnissaminnut atsioqatigiipput.
- Ruslandimi aamma Norgemi nunap inoqqaavinik suleqateqarnitsinni, Raipon pingaarnertut suleqatigaarput, suleqatigiinnerpullu pillugu kiisami isumaqatigiissuteqaratta nuannaarutigaarput, Imartamut Barentimut allaffeqarfimmit aallartitat siuttuat Laila Dalhaug oqarpoq.
Isumaqatigiissummi Moskvami marlunngormat atsioqatigiissutigineqartumi, nunap inoqqaavi Ruslandip avannaaniittut nukittorsarneqarnissaat ineriartortinneqarnissaallu siunertarineqarput. Ilaatigut tamanna pissalluni kulturikkut paarlaateqatigiittarnertigut, suliniutinillu paasissutissiisarnertigut tapiissuteqartarnertigullu.
Atsioqatigiittut ukiuni arlalissuarni suleqatigeereerput, maannali suleqatigiinnerat tassa pappialanngorlugu atsioqatigiissutigineqarluni.
- Issittoq ullutsinni soqutigineqaqaaq. Issittumut aamma Barentip Imartaata sineriammiuinut attaveqarnitsinni ilisimavarput, tamaanna inuppassuarnit assigiinngitsunik kulturilinnit najugaqarfigineqarmat, taamaalillunilu aningaasarsiornikkut soqutigisanut taamaallaat tunngassuteqarani, Raipon-imi siulittaasup tullia Rodion Sulyandziga oqarpoq.
RAIPON, Ruslandimi nunap inoqqaavinit naggueqatigiinnit assigiinngitsunit 40-nit ilaasortaaffigineqartoq, kattuffiit allat tallimat peqatigalugit, Issittumi nunap inoqqaavi sinnerlugit Issittumi Siunnersuisoqatigiinni ilaasortaapput.