Kirkenesimi atuakkanik atorniartarfik russisut oqaasilinnut aamma ammavoq.Assi: Kristina/Flickr

Ruslandip Norgellu avannaata ikinngutigiilluarnertik paariniarpaat

Nunat killiit Ruslandillu akornanni pissutsit pitsaavallaanngillat, Norgelli avannaani pissutsit allaalluinnarput. Norgemiut Russillu tamaani ikinngutigiipput, oqaluttuarisaanermi taamaattuarsimallutik. Naallu tamaani eqqissisimasoqaraluartoq, Ukrainemi pisut aamma sunniuteqarput.

KIRKENES: Norge Ruslandilu sorsuunnikuunngillat, ukiuni hunnorujulikkaani taamaassimallutik.

Norgellu avannaani illoqarfiit ilaanni Kirkenesimi innuttaasut aperigaanni oqassapput Rusland tamaani suleqatigilluarneqartoq. Kirkenes Ruslandimut killeqarfimmit 10 kilometerinik ungasitsigisumiippoq.

Frode Bergip tamanna nalunngilaa. Taanna killeqarfimmi nakkutilliisutut 1975-imit siorna 2014-ip tungaanut sulivoq, kingornalu killeqarfimmik nakkutilliisunik aqutsisuulluni. Taassuma russit nakkutilliisui suleqatigilluarsimavai:

- Ajornartorsiutit aaqqiivigineqarnissaat pillugu killeqarfik akimorlugu qanimut suleqatigiissutigisarpavut, suleqatigiinnerlu ineriartortinneqartuarsimalluni. Rusland aaqqiissuteqarnissamut ammajuarnikuuvoq, killeqarfimmilu ukiuni 24-ni sulininni Ruslandimiut suleqatigilluaqaagut, Frode Berg oqarpoq.

 

Inuiaqatiggiit marluk kattussimapput

Sovjetunioniumsimasoq 1991-imi atorunnaarmalli Norgemiorpassuit Ruslandimut nuussimapput, akerlianillu Russit amerlasuut Norgemut nuullutik. Kirkenesimi innuttaasut amerlasuut russiupput, allaallumi inuiaqatigiit taakku marluk kattussimallutik.

Frode Bergimut tamanna aamma atuuppoq, tassami russinik ikinnguterpassuaqarami:

- Ruslandimeersumik ikinngutitaaruit ikinngutaalluassaaq. Tamanna aamma ataqqineqartariaqarpoq, tassami tatiginninnermik aamma pilersitsisarmata, Frode Berg oqarpoq.

 

Ukrainemi pisut aaqqiagiinngissutigineri Kirkenesimi malugineqarsinnaavoq

Nunalli killiit Ruslandillu Ukrainemi pisut pillugit aaqqiagiinngissuteqarnerat Kirkenesimi aamma malugineqarsinnaavoq.

EU-p Ruslandimut niuernikkut aningaasarsiornikkullu iliuuserisai russit pisisinnaassusiannik eqquivoq, Kirkenesimilu niuerneq 30 procentinik appariarsimalluni. Ruslandillu aningaasaata rublip nalikilligaluttuinnarnera pissutaalluni Norgemiut Ruslandiliartalerput akikitsunillu pisiniarsinnaalerlutik.

Naallu politikkikkut pisut ikinngutigiinnerlu immikkoortinniaraluarini, pisut eqqartorneqanngitsoorneq ajortut Frode Bergip oqaatigaa.

Taanna maanna soraarninngornikuuvoq, Røde Korsimilu nammineq kajumissutsiminik maanna sulilluni.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat