Ruslandip Issittup imartaaniitsitaqarnini maanna annerulersinniarpaa
Naalagaaffiup pissaanilissuup Ruslandip Issittup imartaani Ruslandip oqaasissaqarfigisaani, ujaasinernut annaassiniarnernullu sullissivinnik imminnut ataqatigiissunik pilersitsinissani pilersaarutigaa.
Allattoq Elisa Isaksen
Pilersaarut Ruslandimi ajunaarnersuarnut sillimaniarnermut ministeeriaqarfimmit piviusunngortinneqassaaq, sullissiviillu qulit sanaartorneqassapput, issittumilu angalasunik nakkutilliineq ajutoornernillu pinaveersaartitsinerit taakkunani isumagineqassallutik, nutaarsiassaqartitsivimmi RIA Novosti-mi taama allaaserinnittoqarpoq.
Tamatumunnga peqatigitillugu Ruslandimi oqartussaasut, ajornartorsiortunut Ruslandip issittortaaniittunut ikiorsiinissamik periarfissiiniarput.
Sullissivinnik pilersitsinerup 55 millionit dollarsinik akeqarnissaa naatsorsuutigineqarpoq.