Nunanit allanit

Ruslandip Issittumi imaatigut nassiussanik assartuineq annertusarniaraa

Issittoq pillugu Ruslandimi ataatsimeersuarnermi præsidentip Vladimir Putinip pilersaarut annertooq issittup inissisimaneranut qulakkeerinnittussaq marlunngornermi saqqummiuppaa.
Putin naapertorlugu Ruslandip imaatigut nassiussanik assartuineq annertusarniarpaa.
Allattoq Mads Lynge
apriilip 10-at 2019 09:30

Business Insider taama allaaserisaqarpoq.

Ruslandinip issittortaata sineriaani nutaanik talittarfiliornissat attaveqaqatigiinnermullu sanaartornissat pilersaarummi ilanngunneqarsimapput. Sakkutuullu umiarsui sikunik aserorterisinnaasut amerlineqarlutik inerisarneqarnissaat Ruslandimit pilersaarutigineqarpoq.  

St. Petersborgimi issittoq pillugu ataatsimeersuarnermi Putinip saqqummiinera, Finlandimit, Islandimit, Norgemit Sverigemiillu siuttunit peqataaffigineqarpoq.

Putinilu naapertorlugu Ruslandip imaatigut nassiussanik assartuineq annertusarniarpaa.

- Pilersaarut piviusorsiorpoq suliarilluagaallunilu piviusorsiortuuvoq, Putin issittoq pillugu ataatsimeersuarnermi oqarpoq

Taassuma oqalugiarnermini Rusland ipnunani kisiartaalluni atomip nukinganik ingerlatilinnik umiarsuarnik sikusiuteqarnera erseqqissaatigaa.

Rusland sikusiussuarnik atomip nukinganik ingerlatilinnik sisamanik maanna umiarsuuateqarpoq, allanillu pingasunik sanaartortoqalersoq Putinip oqaatigaa. Umiarsuarnillu sikusiutinik angisuunik katillugit 13-inik 2035-mi pigisaqalernissaq pilersaarutigineqartoq Putinip aamma oqaatigaa.

Aammattaaq Kolap qeqertaasaani Murmanskimi Kamtjakkallu qeqertaasani Petropavloskimi umiarsualiviortoqassasoq oqaatigaa.

Aamma atuaruk