Ruslandimi upalungaarsimalluinnarput

Tamat angallaffianni ilaasartaatinut assigiinngitsunut saassussisoqarnissaanik sioorasaarisoqarsimanera isertortumik paasiniaasartut pisortaata kalerriutigereeraalu, Ruslandimi sakkutuut politiillu annertuumik ullaaq upalungaarsimatinneqarput.

Politiit qimmiilu qaartartulerisartut Moskvami metromi piareersimatinneqarput, oqarasuaatinillu angallattakkanik iluarsaassisartut peqquneqarlutik, qimuttuitsut nunap iluatigut aqqutaanni innaallagissamut aqqutit tamaasa attaveerutitikkallassagaat.

Sumiiffinni arlalissuarni aqquserngit assersorneqarput – pingaartumik sorsuffiusimaqisumi Tjetjeniami, timmisartoqarfinni qimuttuitsullu unittarfiini inuit tikillutik aallariartorlutilluunniit akunnittut sukumeeqqissaartumik misissuivigineqartarsimasut nuna tamakkerlugu nutaarsiassaqartitsiviit nalunaarput.

Angallaffinni pingaaruteqartuni arlalissuarni suli annertunerusumik upalungaarsimasoqarnissaa illersornissamut Ruslandimi ministerip, Sergei Ivanovip, aamma naalakkiutigaa.

Isumannaallisaanissamut sullissiviup, FSB-p, pisortaa, Nikolaj Patrusjev, peqqarniisaarnissamut aarlerilluni ippassaq oqamisaarmat, peqqarniisaarfigineqarnissaq aalleqqutigineqalerpoq. Rusland ukiuni kingullerni aqqaneq-marlunni arlaleriarujussuarluni peqqarniisaarfigineqareerpoq, Tjetjeniami muslimit immikkoorniat russit sakkutuuinit akiorniarneqarnerinut attuumassuteqartunik.