- Issittoq tassanilu pisuussutit Ruslandip inuussutissarsiornikkut ingerlatsineranut iluanaaruteqartarneranullu pingaarutilerujussuupput. Taamaattumik Ruslandimi suliffeqarfiit nunat inoqqaavi ikinnerussuteqartut aallussaannut akornutaasutut isigisaraat, nunap inoqqaavisa pisinnaatitaaffii pillugit suliniaqatigiiffiup pisortaa, Rodion Sulyandziga, russit nutaarsiassaqartitsiviannut oqarpoq.Assi: Alexander Nemenov/AFP/Ritzau Scanpix

Ruslandimi nunap inoqqaavisa innuttaasutut pisinnaatitaaffii pillugit suliniaqatigiiffik atorunnaarsinneqartoq

Ruslandimi nunap inoqqaavisa innuttaasutut pisinnaatitaaffii pillugit suliniaqatigiiffik maannamut ukiuni 20-ngajanni atuuttoq Ruslandip illoqarfiisa ilaanni eqqartuussisuisa atorunnaarsippaat.

Nunap inoqqaavisa pisinnaatitaaffii pillugit suliniaqatigiiffik atorunnaarsinneqassasoq Moskvami eqqartuussisuisa aalajangerpaat.

Aalajangiisunut isornartorsiuisut russit oqartussaasuisa iliuuserisaat suliniaqatigiiffiup aallussaannut akiniaanertut nalilerpaat. Russit nutaarsiassaqartitsiviat The Moscow Times taama allappoq.

Russit Inatsisinik Atortitsinermut Ministeriaqarfiata Moskvami eqqartuussisut suliniaqatigiiffiup Ruslandimi inatsisinik kattuffinnut naalagaaffimmut pituttorsimanngitsunut - tassa Ruslandip naalagaaffianit aqunneqanngitsunut - tunngasunik arlalinnik naapertuisimannginnera pissutigalugu suliniaqatigiiffimmik atorunnaarsitseqqusimavai.

Suliniaqatigiiffik Center for Support of Indigenous Peoples of the North / Russian Indigenous Training Center russit oqartussaasuisa nunanut allanut kilitsissiaasorimmassuk suliniaqatigiiffittut akuerisaanngitsutut 2015-imi nalunaarutigaat.

Nunap inoqqaavi ikinnerussuteqartut akornutaasutut isigineqartut

Ruslandip avannarpasissuani, Sibiriami Nunallu Kangilliini nunap inoqqaavisa inuuniarnikkut aningaasaqarniarnikkullu ikiorneqarnissaat siunertaralugu suliniaqatigiiffik taanna 2001-imi pilersinneqarpoq.

- Issittoq tassanilu pisuussutit Ruslandip inuussutissarsiornikkut ingerlatsineranut iluanaaruteqartarneranullu pingaarutilerujussuupput. Taamaattumik Ruslandimi suliffeqarfiit nunat inoqqaavi ikinnerussuteqartut aallussaannut akornutaasutut isigisaraat, nunap inoqqaavisa pisinnaatitaaffii pillugit suliniaqatigiiffiup pisortaa, Rodion Sulyandziga, russit nutaarsiassaqartitsiviannut oqarpoq itisiliillunilu.

- Nunap inoqqaavisa pisinnaatitaaffiinik sivitsortumik illersuivugut. Naalagaaffiit nunallu tamalaat oqallittarfiini naapertuilluanngitsuliornernut tunngasunik oqalliffiusartuni peqataasarpugut.

Ruslandimi eqqartuussiviit qullersaat sakkutuuiarnerit innuttaasutut pisinnaatitaaffii pillugit ilungersorluni suliniaqatigiiffiup atorunnaarsinneqarnissaanut naalakkiineraniit sapaatit-akunnera ataaseq qaangiuteqqajanngitsoq Moskvap eqqartuussisuisa suliniaqatigiiffik atorunnaarsippaat.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat