Ruslandimi aviisit sakkortuumik qisuariarput
Aallartitat sisamat Ruslandimeersut Tuluit Nunaanniit anisitaanissaannut Tuluit aalajangernerat Ruslandimi aviisinit sakkortuumik qisuariarfigineqarpoq, naalagaaffiillu attaveqartitsisuisa akornanni sorsunnermik aallarniinertut nalilerneqarluni.
- Tuluit Nunaanni ministeriuneq Ruslandimut sorsunniarluni aalajangersimavoq – naalagaaffiit attaveqartitsisuisa akornanni, tassa diplomatiskimik, sorsuttoqarnissaannut aalajangersimavoq, Moskvaminngaanniillu akineqarumaarpoq, russit aviisiat Iztvestja taama allappoq.
Russit kilitsissiaata Alexander Litvinenko-p siorna Londonimi toqutaaneranut atatillugu russeq alla Andrei Lugovoi pasineqarpoq, Tuluillu Nunaannut tunninneqarnissaa Tuluit piumasarigaluaraat russit tunniukkusunngilaat.
Ukiut qulit sinnerlugit ingerlanerini aatsaat taama saskkortutigisumik iliortoqarpoq.
- Tuluit russillu akornanni attaveqartitsisukkut sorsuuttoqarpoq. Qisuariaat Moskvameersoq sakkortunerussannguatsiarpoq, aviisi Ruslandimeersoq Kommersant allappoq.
