Ruslandi sakkutuunik Qalasersuarmut aallartitsinialerpoq
Kalaallit Nunaat, taamaalillunilu aamma Danmark, Canadalu assigalugit Issittumi sumiiffiit annertuut oqartussaaffigilernissaannut Rusland piareersarpoq, ilimagineqarpormi uulia gassilu, manna tikillugu suli nassaarineqanngitsut, nunarsuaq tamakkerlugu 25 procenti tikillugu Issittup imartaata naqqaniittut. Tuluit Nunaanni aviisimi Daily Mailimi tamanna allaaserineqarpoq.
- Nunat issittumi eqqaamiut ammasumik oqaloqatiginissaannut Rusland ammavoq, Ruslandilli soqutigisani sakkortuumik ataavartumillu illersorniarpai, Ruslandimi ministeriuneq, Vladimir Putin, Ruslandimi tusagassiorfinni sapaatip-akunnerata uuma ingerlanerani oqaatigineqartut naapertorlugit, oqarpoq.
Vladimir Putin ilutigalugu neriorsuivoq, Issittumi pinngortitap ataqatigiinnerata mianernaqisup eqqummaariffigineqarnissaa nammineq isumagissallugu.
Ruslandimi illersornissamut ministereqarfimmi avammut oqaaseqartartoq oqarpoq, sakkutuut siulliit aallartinneqartussat tassaassasut immikkut sungiusakkat, Issittumi sorsuttoqalissagaluarpat iliuusissaminnut sungiusarluarsimasut.
Ruslandimi illoqarfinni nutaarsiassaqartitsivinni tusarliunneqartartut naapertorlugit, Ruslandip Issittumi sakkutuuliiniarnerani misilinniarneqarpoq tamaani pisunik oqimaaqatigiissaarinissaq, Vladimir Putinillu eqqaasitsissutigaa USA Canadalu sakkutuunik ataatsimoortunik aamma tamaaniititsimmata.
