Rusland timmisartuutiminik sorsuutinik issittumi suliassanut naleqqussaalluni nutarterisoq

Ruslandip timmisartuni sorsuutit maanna nutarternialerpai, taamaalillutik Issittumi atorsinnaaniassammata. Russit nutaarsiassaqartitsiviat naalagaaffimmit nakkutigineqartoq Itar-Tass taama nalunaaruteqarpoq.

Sakkutuut timmisartortartut malersuutaat MiG-31-mik taaguutillit, Natomit 'Foxhound'-imik taagorneqartut, ilaatigut Ruslandip avannaani Issittup imartaani 2019-ip aallartinnerani piareersimanissaat anguniarneqarpoq.

Malersuutit nutartikkat ilaatigut nutaanik radarilerneqassapput, qaartartunillu igeriuttakkanik silaannakkut saassussinermi atorneqarsinnaasunik atortulerneqassallutik.
 

Ruslandimit Issittoq radarikkut nakkutigineqarpoq
Ruslandip Issittumi sakkutooqarnikkut ineriartortitsinissani aasaq nalunaarutigaa, ilaatigut immakkut sorsuutinik aqqartartunillu inerisaaniarluni. Aamma oktobari naalersoq illersornissamut ministerip Sergej Shoigup oqaatigaa, Ruslandimit Issittoq tamakkerlugu radarikkut malinnaaffigineqarsinnaangajalersoq, aamma nunap avannamut kangimullu killeqarfiata eqqaanut "nunap ilaanut iserniarsarisut kissaatigineqanngitsut" iliuuseqarfigineqarsinnaangajalersut.
 
Issittup imartaaniittut qeqertat arlallit Ruslandip avannaaniittut maanna sakkutooqarfeqarput.
 
Ruslandillumi Issittumi sakkulersornikkut piorsaanera tupaallaatigineqanngilaq, tassami nunat issittumut killeqarfeqartut tamarmik taamaaliormata. Nalunaaruteqarneralli nunap pissaanilissuup iliuuseriniakkaminik nunanut sanilerisaminut pilersaautiminik saqqummiussineratut isigisariaqartoq, sakkutuut qullersaasa ilaata Lars Cramer Larsenip illersornissamut qullersaqarfimmeersup aviisimut Politikenimut oqaatigaa.
 

Ilulissani isumaqatigiissut isumaqataaffigaat
Lars Cramer Larsenip tamatumunnga peqatigitillugu erseqqissarpaa, Ruslandip, Danmark, Norge, USA aamma Canada peqatigalugit Ilulissani isumaqatigiissut isumaqataaffigimmagu, tassanilu nunat isumaqatigiissutigalugu isumaqatigiinngissutit nunat tamalaat akornanni eqqartuussivimmi suliarineqartassasut.
 
- Isumaqatigiissummi erseqqissumik taaneqarpoq, aaqqiagiinngissutit isumaqatigiinniarnikkut aalajangiiffigineqartassasut - aallaqqaammut illugiilluni isumaqatigiinniarnikkut. Imaluunniit nunat tamalaat imartat pillugit kommissioniat aqqutigalugu, Lars Cramer Larsen oqarpoq.
 
- Canadamiut aamma pisinnaatitaaffimminnut tunngasunik suliniuteqarluarput. Danmark aamma naalagaaffeqatigiinnut tunngatillugu taamaaliorpoq. Canadamiut umiarsuarnik alapernaarsuutinik sikunik aserorterisinnaasunik pissarsereersimalerput. Aamma qaammataasamik issittumik nakkutilliisinneqarsinnaasumik aallartitsinissaq Danmarkip isumaliutigaa. Nunalli tamarmik nunat tamalaat inatsisaasa malinneqarnissaannik imminnut pisussaaffilereerput, Lars Cramer Larsen naggasiivoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat