Rusland oqartussaaffeqarusuppoq

Issittumi annertunerusumik oqartussaaffeqalerusulluni 50 milionit dollarinik Rusland aningaasaliivoq. Ruslandimi nutaarsiassaqartitsivimmi RIA Novostimi tamanna allaaserineqarpoq.
februaarip 08-at 2010 06:10

- Issittup imartaani misissuinissatsinnut aningaasat taakku atorneqassapput, Ruslandimi Aatsitassanut Ikummatissanullu Pisortaqarfimmiit oqaaseqarput.

Issittumi uuliaqarlunilu gasseqarsinnaanera Kalaallit Nunaata/Danmarkip, USA-p, Canadap, Norgip, tassalu maanna aamma Ruslandip oqartussaaffigerusuppaat. Nunat issittumiittut taakku tallimat tamarmik immikkut 322 kilometerisut annertutigisumik issittup imartaani oqartussaaffeqarsinnaatitaapput.

Nunap uppernarsaatissaqartippagu oqartussaaffitsik 322 kilometerinit annertunerusoq, immap naqqani annertunerusumik oqartussaaffeqarsinnaatitaanissaq immamut pisinnaatitaaffik pillugu Naalagaaffiit Peqatigiit oqartussaaffiannit piumasarineqarsinnaavoq.

Issittup imartaata naqqani annertunerusumik oqartussaaffeqalernissani Ruslandip 2001-imili piumasarivaa, uppernarsaateqarnerunissaali Naalagaaffiit Peqatigiinnit piumasarineqarpoq, Ruslandilu annerusumik uppernarsaateqarnerulerniarluni 2005-imi 2007-imilu issittup imartaani ilisimasassarsiorpoq.

Præsident Dmitry Medvedevip Ruslandillu annerusumik uppernarsaanissaannut killiliussaq ukioq-manna naassaaq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq