Rusland issittumi sakkutuuliiniarpoq
Ruslandip sillimaniarnermut isumalioqatigiissitaanit nalunaarutigineqarpoq immikkut issittumi inissinneqarsinnaasunik sakkutooqatigiinik sungiusaatitsilerlutik. Tamassumunnga takussutissaavoq 2020-p tungaanut Russit nukissaqarniarneq pillugu ataqatigiissaarinerminni, issittumi aatsitassat uuliallu qallornissaannut sillimmartaalernerat. Issittumimi sikup aakkiartuinnarnera ilutigalugu tamaani aatsitassaqarnissaanik, minnerunngitsumillu uuliaqarferujussuaqarnissaanik ilimasunneq eqquutissappat, pisuussutit imaannaanngitsut tamaani qallorneqarsinnaalertussaapput. Kalaallit Nunaat Danmarki aqqutigalugu issittumi killeqarfiit inissitsiternissaannut sunniuteqassaaq. Qalasersuup tungaanut killeqarfillit allat tassa, Rusland, USA, Canada Norgelu killeqarfiit inissinneqarnissaannut isumaqatigiinniaqataapput, akaareqatigiillunili isumaqatigiinniarnerit inernilernissaat anguniarneqassasoq tamarmik isumaqatigiissutigaat. Taamaammat aperisoqarsinnaavoq taava sooq Russit sakkutuunik immikkut issittumi inissinneqarsinnaasunik pilersaaruteqalissappat. Sakkutuut naalagaaraat, sakkutuut ilisimatusarfianni atorfilik, Henrik Jettish Jørgensen oqarpoq, Russit issittumi sakkutuulersorniarnerat pisuussutit qallorneqalerpata isumannaallisaanissamut piareersarnertut isigisariaqartoq, aammali NATO-mi ilaasortat issittumi sakkulersornialissagaluarpata Russit takutikkusuppaat aamma namminneq taakkunannga sanngiinnerunatik. Naalagaaffiillu tamat isumaqatigiissutaannik Russit unioqqutitsiniarnissaat aarleqqutigisariaqanngitsoq.
