Rusland-ip Kalaallit Nunaat saaffigigaa – aalisarneq pillugu suleqatiserinnittut
Rusland-ip Kalaallit Nunaannik qaninnerusumik suleqateqalernissani annertuumik soqutigalugu takutinnikuuaa. Pisuussutinut, aatsitassanut kiisalu kulturimut atatillugu.
Sermitsiaq.AG taamatut allappoq.
Rusland-ip qaninnerusumik suleqateqalernissaminut pilersaarutai, politikkikkut nunanut allanut atatillugu nalunaarusiami, oktobarip 28-anni Inatsisartut suliarisassaanni tamanna atuarneqarsinnaasoq, tusagassiorfik allappoq.
Rusland-imiut aallatitaata qaffasissumik inissisimasup Vladimir Barbin-ip, Danmark-imi ambassadør-iusup tamanna aviisimut ilumoornerarpaa.
– Rusland Kalaallit Nunaannut qaninnerusumik attaveqarnissani annertuumik kissaatigaa. Issittumi pissutsitigut assigiissuteqaqaaqigatta suleqatigiinneq iluaqutigisinnaaqaarput, ilisimasavut illuatungeriilluta ilinniutigisinnaagatsigit, Vladimir Barbin Sermitsiamut oqarpoq.
Pisuussutit iluarnerpaamik atorluarnissaat Rusland-ip soqutigisaraa, ingammik aalisarnermi politikkimut atatillugu, ambassadøri oqarpoq.
Vladimir Barbin-ip oqaasii naapertorlugit Rusland-ip kissaatigaa, ”nunat issittumut sineriallit aalisarnissamut assigiimmik periarfissinneqarnissaat anguniarlugu, pisuussutinik killilersuinissap suleqatigiissutigineqarnissaa.
Sapaatip akunnerani kingullermi aamma EU nalunaarpoq, issittumi sunniuteqaqataanini patajaallisarniarlugu Nuummi allaffittaarniarlutik. Allafiup qaqugu pilersinneqarnissaa nalunaarutigineqanngilaq.
Issittoq najorlugu pingaarutilimmik periarfissagissaarnertut isigineqartarpoq.
Issittoq pinngortitami pisuussuteqaqaaq nunalu annertuumik qaqutigoortunik akoqarluni, nunarsuatsinni mingutsitsiunnaariartuaarnermi pingaaruteqartussatut ilimagineqartunik.