Rusland Georgialu sorsuutingajalerunarput

Sakkutuut georgiamiut Sydossetiap illoqarfiisa pingaarnersaanni, Tskhinvalimi, pikitsitsisunut immikkoornianut sakkortuumik unnuaq sakkuaassimapput. Sakkutuut georgiamiut qamussuarnik sorsuutinik illoqarfimmut inissiterisimapput, qaartartunillu illoqarfimmut saassussillutik, saassussisullu timmisartunit malersuutinit taperserneqarput.

Ruslandimi ministeriunerup, Vladimir Putinip, georgiamiut sakkutuuisa makitasuumik saassussinerat ullumi assuaraa, oqarluni, Rusland akiniaasariaqassasoq.

Georgiami præsidenti, Mikhail Saakasjili, ullumi oqarpoq, georgiamiut oqartussaaffigisaat russit akornusiiniartussanik inuttalermassuk Georgiami illoqarfinnut russit timmisartuutai malersuutit qaartartumeerisariaqalersimasut.

Russit sakkutuuinit tusarfiit ungasinngitsukkut nalunaarutigaat qamutinik sorsuutinik qaruarsualinnik Syossetiap illoqarfiisa pingaarnersaannut ingerlaartitsillutik. Nutaarsiassaqartitsivik Reuters naapertorlugu Georgiami naalagaaffimmi isumannaallisaanermut ataatsimiititaliami tusarfiit ilaat oqarpoq, Ruslandip Georgiamut isaatitsineranut pissutaasoq nunat taakku marluk sorsuutilernissaasa qanittuararsuunera.