Rusland avannaqqullugu Kangimut Aqqut pilerinarsarniarpaat

Suliffeqarfinnut assartuinermik ingerlatsisunut, Ruslandi avannaqqullugu Kangimut Aqqut pilerinarsarniarlugu Rusland attaveqaatinik nutaanik maanna sanaartornialerpoq.
Allattoq Gedion Storch
septembarip 28-at 2011 08:19

Sapaatip akunnerani kingullermi Ruslandip avannaatungaani Arkhangelsk-imi Issittoq pillugu isumasioqatigiinnermi tamanut paasinarsivoq, naalagaaffimmi aningaasaqarnikkut nutaamik ineriartortitsinissami  Ruslandimit Issittup qanoq pingaartinneqartiginera.

Ministeriuneq Vladimir Putin, aviisimut The Telegraphimut oqarpoq, assartuinermi ingerlatsisut suliffeqarfiit piffissamik aningaasanillu aqqummik atuinerminni sipaaruteqartartussaanerat pissutigalugu, Ruslandi avannaqqullugu Kangimut Aqqut ukiuni aggersuni niuernermi aqqutit pingaarnersarilerumaaraat. Sikup aakkiartornera ilutigalugu aqqut taanna pilerinarsarniarlugu Rusland suli maanna annertunerusunik suliniuteqalerpoq.

Taamaattumillu Rusland avannaqqullugu Kangimut Aqqut atuarlugu attaveqaatinik nutaanik Rusland sanaartornialersoq, Putinip naqissuserpaa:

- Aqqummik atuineq pisariillisarniarlugu pilersaarutivut naapertorlugit, kuummi assartuinerit, biilit ingerlaarfii qimuttuitsullu aqqutaat nutartissavavut.

Aqqullu ingerlaarfiusoq sinerlugu attaveqaqatigiinnermi attaveqaatit pitsaanerusut aammattaaq sanaartorneqassasut Putinip oqaatigaa nangillunilu:

- Aammattaaq aqqummi ingerlaarfiusussami mittarfiit pioreersut nutarterneqassapput nutaanillu sanaartortoqassalluni, taamaalilluni assartuinermik suliaqartut siunissami aqqummik atuisussat aningaasaqarnikkut iluanaaruteqarnerusinnaaniassammata.  Kangiatigut aqqut sillimaniarnikkut, pitsaassutsikkut aamma akia eqqarsaatigalugu assartuinermi aqqutinut allanut unammillersinnaajumaartoq kissaatigaarput, Vladimir Putin oqarpoq.

Naalagaaffiup aningaasaqarnikkut periarfissaasa Issittumiittut annertuumik pingaartinneqarnerat russit naalakkersuisuisa piffissami sivitsulersumi oqariartuutigisareeraallu, suliniutit nutaat saqqummerput.