Rumæniamiu kalaallimik pinngitsaaliilluni arnerisimasutut pasivaat
Angut pinngitsaaliilluni arnerileruttortoq naammattoorneqarpoq, Christianiamiunillu arlalinnit unatarneqarluni, Københavnip politiivini misissueqqiissarnermut pisortaq Peter Steffensen taama ilisimatitsivoq.
Kalaaleq arnaq politiinit nassaarineqarami ilisimanngilaq Rigshospitaliliaanneqarlunilu.
- Ilisimannginnera pinngitsaalineqarluni arneriffigitinneranit, imigassartorsimaneranit aanngajaarniutinit imaluunniit allarluinnarmik pissuteqarnersoq suli ilisimanngilarput. Taamaattorli inuunerminik ulorianartorsiunngitsoq oqaatigisinnaavarput, Peter Steffensen oqarpoq.
Aamma taassuma erseqqissarpaa pinngitsaaliilluni arnerisoqarsimanera politiit uppernarsaruminaatsikkaat. Politiit pisumut aatsaat paasisaqalerput, angut Christianshavnimi Torvegademi atisaqarani angalaartoq pillugu nalunaarfigineqaramik. Angut atisaqarani angalaartoq tassaavoq Rumæniamiu 56-inik ukiulik, pinngitsaaliilluni arnerisoqarneranik ilisimasaqanngilluinnarnerartoq.
Rumæniamiup killisiorneqareerluni tigummigallagaanera nalunaaquttap akunnerinik 72-inik sivitsorneqarpoq.
