Rumsfeld eqqartuussisunut tunniunniarneqarpoq
Donald Rumsfeld, USA-mi illersornissamut ministeritut tunuaqqammersoq, eqqartuussisunut tunniunniarneqarpoq. Matumani pineqarluni naalliutsitsinernut akisussaasimasinnaanera. Suliassaq Tysklandimi inatsisilerituunit nunanit tamalaaneersunit saqqummiunneqarpoq. Rumsfeld pasillerneqarpoq Cubami Guantanamo-mi peqqarniisaarniatut pasisanut naalliutsitsinissamik aamma Irak-imi parnaarussivimmi Abu Ghraib-imi naapertuilluanngitsuliornissanut akuersisarsimasutut.
Donald Rumsfeld Tysklandimi eqqartuussisunut tunniunneqarpoq, tassami Tysklandimi inatsisit naapertorlugit inatsisinik unioqqutitsinerit nunarsuarmi sumiluunniit pisimagaluarpata Tysklandimi suliarineqarsinnaammata.
Inatsisilerituut nunanit tamalaaneersut sullippaat inuit naalliutsinneqartarsimasut aqqaneq-marluk.
Inatsisilerituut nunanit tamalaaneersut Tysklandimi naalagaaffiup unnerluussisartua qinnuigisimavaat naalliutsitsisarsimaneraanerit misissoqqullugit. Kingornatigullu USA-p peqqarniisaarnianut sorsunneranut atatillugu Rumsfeld atorfikkaallu arlallit sorsunnermi ajortuliorsimasutut eqqartuussisunut tunniunneqarsinnaanerat ilanngullugu.
Inatsisilerituut Rumsfeld pisuutippaat, tigusanit paasissutissanik pissarsiniarluni naalliutsitsisarnissamut akuersisarsimanerarlugu.
Siusinnerusukkut Rumsfeld-ip USA-milu naalakkersuisut Guantanamo-mi naalliutsitsisoqartarsimannginnerarlugu oqaatigereerpaat.
Inatsisilerituut nunanit tamalaaneersut Rumsfeld-ip eqqartuussisunut tunniunneqarnissaa periarfissaqarluarnerarpaat. Tassami Tysklandimi eqqartuussiviup naalakkersuinikkut sunnerniarneqarsinnaanera periarfissakinneruvoq, maanna Rumsfeld soraarsitaareernikuummat.
Inatsisilerituut suliassaq Haagimi nunat tamalaat eqqartuussivianni ingerlakkusunngilaat, eqqartuussivik USA-p akueriumanngimmagu. Aamma eqqartuussineq FN-imi ingerlakkusunngilaat, tassami USA-p naaggaarsinnaatitaanini atorlugu eqqartuussineq akornusersussammagu.
