Rumaania Bulgarialu ilaasortanngulerput

Allattoq Mads Lynge
septembarip 26-at 2006 17:02

Rumaania Bulgarialu ukiortaamiit EU-mi ilaasortanngussasut EU Kommissionip nalunaarusiamini ullumi innersuussutigaa.

EU kommissionip nunat taakku ilaasortanngornissaat ukiumik ataatsimik kinguartissinnaagaluarlugu nunani taakkunani naalakkersuinermik suliaqartut aaqqissuusseqqinnerat ajoqusiinnarsinnaagamikku aappaagu ilaasortanngortinneqarnissaat innersuussutigaat.

Rumaaniami Bulgariamilu innuttaasut nuannattut, DR-ip tusagassiortuata Karin Larsenip Bulgariap illoqarfiisa pingaarnersaanniit Sofiamiit oqaluttuaraa:

- Berlinimi qammarsuaq maani innuttaasunik killilersuisimaqisoq maanna atorunnaarsinneqarpoq, Bulgariami naalakkersuisut siulittaasuat Sergey Stanichef aappaagu EU-mi ilaasortanngornissartik pillugu taama oqarpoq.

Kommunistit ajalusoornerisa kingunerisaanik Berlinimi qammarsuup 1989-imi atorunnaarsinneqarnera Europallu ataasiusutut suleqqilernissaa Bulgariami naalakkersuisut siulittaasuata taamatut oqarnermini eqqarsaatigigaa malunnarpoq.

Bulgariami naalakkersuinermik suliaqartut EU-mi ilaasortanngornissartik nuannersumik oqaaseqarfigisaqattaarpaat.

Bulgaria 2004-mi NATO-mi ilaasortanngorpoq massakkullu EU-mi ilaasortanngornissaq anguneqalermat Bulgariap nunanut allanut ilaasortaanissaminik suliniuteqarnera taamaalilluni naammassilerpoq.

Rumaaniami tamanna aamma nuannatigineqarpoq. Taavani naalakkersuinermik suliaqartut champagniamik iggiserlutik unnummut nerripput.

Nunat taakku marluk EU-mi ilaasortanngorniarneranni piumasaqaateqarpoq. Peqquserluttuliortarnerit akiorniarlugit nunat taakku suliniuteqaqquneqarput, EU-mit tapiissutit nakkutigineqarluartumik aqunneqarnissaat aamma piumasaqaataavoq. Piumasaqaat taanna naammassineqanngippat tapiissutit tunniunneqartarunnaassapput.

Naatsumik oqaatigalugu nunat taakku marluk suliassarpassuaqarput. Bulgariami nunanut allanut ministeri oqarpoq ullumikkut nuannanniarallarlutik. Bulgariamili pissutsinik malinnaasoq oqarpoq Bulgaria EU-mi ilaasortanngorniarnermini anguseqqavissimasoq.

Innersuussutigineqartoq akuerineqassappat EU-mi innuttaasut 30 millioninik amerlissapput.