Rullepølsit Nunatsinni niuertarfinniittut ajoquteqanngillat

Suliffeqarfimmiit tassanngaanniit bakteria listeriamik taaneqartartoq, tunillaassuulluni aallartissimasoq, Danmarkimi inuussutissat pillugit qullersaqarfiannit paasineqareersorlu suliffeqarfik matuneqarpoq, taakkulu tunisassiaat Danmarkimi niuertarfinniilereersut tamaasa igitassanngussasut peqqussutigineqareerluni.

Rullepølsit Nunatsinni niuertarfinniittut ajoquteqanngitsut Pilersuisumit, Pisiffimmit aamma Kalaallit Nunaanni Brugsenimit nalunaarutigineqarpoq.

Nunatsinnili inuussutissat pillugit oqartussaqafimmit kajumissaarutigineqarpoq, Danmarkimut angalasimasut qallersuutinillu assigiinngitsunik Nunatsinnut eqqussisimasut mianersornissaannik, siunnersuutigalugu qallersuutissat pisiatik, inuussutissanik suliffeqarfimmit Jørn A. Rullepølsimit suliarineqarsimanersut misissorluassagaat.