Rullepølsi ulorianartoq 50 kg Nunatsinni nerineqarsimavoq
KNI rullepølsiliorfimmit tassannga pisisimavoq, Pilersuisumilu pisiassaatigisimallugit. Rullepølsiliorfimmeersut aamma Kangerlussuarmi pisiniarfinni, hotelimi, mittarfiullu nerisarfiani pisiassaasimapput.
KNIp nioqqutissanik pisiniarnermut tuniniaanermullu pisortaata, Kurt Lauritsenip, KNR-imut oqaatigaa rullepølsit ulorianartut 50 kg missaat Nunatsinni tunineqarsimasut.
KNI nunatsinnut nioqqutissanik eqqussuisuusoq aalajangersimavoq, rullepølsiliorfimmit nerisassiat pisiassaajunnaarsissallugit.
Pilersuisumi pisisartut rullepølsinik allanillu Jørn A. Rullepølser A/S-ineersunit pisisimasut pisiatik igissagaat pisiniarfinnulluunniit utertissagaat Kalaallit Nunaanni Uumasut Nakorsaqarfianit Inuussutissalerinermullu Oqartussaqarfimmit kajumissaarneqarput.
Innuttaasut Danmarkimi qanittukkut angalasimasut nioqqutissanik Jørn A. Rullepølse A/S-imeersunit pisiaqarsimagunik, pisiarisimasatik igissagaat, Kalaallit Nunaanni Uumasut Nakorsaqarfia Inuussutissalerinermullu Oqartussaqarfik kajumissaarivoq.
Bakteria listeria, danskit aqqaneq marluk toqqutigisaat allallu arfineq pingasut napparsimalissutigisaat, nerisassatigut tunillaassuititsisuusoq nerisassiorfimmit Jørn A. Rullepølser A/S-imeersoq paasineqarpoq, suliffeqarfillu matuneqarluni.
Inuit tamarmik bakteria taanna arlaanni nerisarpaat, inuilli sanngeereersut naartusullu kisimik napparsimassutigilersinnaavaat. Napparsimalerlutik unitsinneqartut kissarneqartarput, nukillaangasarlutik timmisinnaasarlutillu meriarlutillu.