Rudolfip neqaa oqallisaavoq

Niuertarfik Lidl Tuluit Nunaanni pisiniarfiutimini tuttup neqaanik neqerooruteqarnera sakkortuumik isornartorsiorneqarpoq.
Allattoq Jaaku Lyberth
novembarip 16-at 2010 07:00

Juullip pilerinartua tuttup neqaanik tuniniaanerup aserorpaa, uumasunik illersuiniaqatigiiffiup "Viva"-p oqaaseqartartua Justin Kerswell oqarpoq.

Tuttu tassaavoq juullip inuata nunarsuarmi meeqqanut juulliaqqap unnukkuani tunissutissanik agguaassinermini qimuttorisartagaa.

Europami USA-milu inuit amerlanerit tuttumik isiginnittarnerat taamaappoq, aviisi politiken taamatut allaaserisaqarpoq

Viva uummasut atugaasa ajunnginnerulernissaanik suliniuteqartuusoq, isumaqarpoq niuertarfik Lidl uumasup nujuartap neqaanik tuniniaanermigut atornerluisoq.

Tuttup neqaat Tuluit Nunaanni pisiarfinni Lidlini tuniniarneqartut, Ruslandimi tuttuutilinnit pissarsiaapput. Uumasunik illersuineqatigiiffik Viva isumaqarpoq, tuttut taakkua Sibiariami tuttuutillit snescooterit qulimiguullit motorcykkillu atorlugit pisarisarmatigit tamanna isornartoqartoq.

Tuttut pisarineqarneranni naalliutsitaasimanerannik uumasunik illersuiniaqatigiiffiup oqarnera Lidlimit ilumuunnginnerarneqarpoq.

Tuttut nalinginnaasumik pinngortitami avatangiisiminni uumasuupput nikeriarfissaqarluarlutik neriffigisinnaasaminnik, pisiarfissuup Lidlip oqaaseqartartua aviisimi "The Grocer"-imi taamatut issuarneqarpoq.

Tuttup neqqaa Tuluit Nunaanni kilumut 150 koruunit missaannik akeqarpoq.

Tuluit Nunaanni aviisit pingaarnersaasa ilaanni Daily Mailimi atuartartut amerlasuut isumaqarput tuttut naalliutsinneqartarnerannik oqalunnerit ingasattajaarnerusut.

Atuartartut ilaat aperivoq ..suna ajornartorsiutaagami, amerikamiut erniarsuusiaasa ilaat pissutaalluni tuttu juullimut ilaaginnarpoq.