Rubiniutiminik utertitsiniarluni suli utaqqivoq
Thue Noahsen oqarpoq annissinissaminut akuersissummik peqarluni, aamma ujaqqat utertinniarlugit Aatsitassanut Pisortaqarfimmut saaffiginnittaraluarluni.
Ukiut marluk qaangiupput suli akissuteqarfigineqarani. Thue Noahsen 2007-imi Kangerlussuarmit aallalerluni kurondit 4,9 kilogrammit nunatsinnit anninniakkaminit arsaartippoq. Kurond tassaavoq aatsitassaq rubininik akulik.
Thue Noahsenip ujaraatini utertinniarlugit Aatsitassanut Pisortaqarfik arlaleriarluni saaffigisaraluarpaa. Kingullermik siorna ukiakkut saaffigai.
-Takoqqinngisaannarpakka taakku. Susoqarnersoq naluara, saaffigiuaraluarlugit paasitinneqarneq ajorpunga. Taama oqarpoq eqqumiitsuliortoq Thue Noahsen.
Pisoq maanna politiinit misissuiffigineqarmat Aatsitassanut Pisortaqarfiup pisut ataasiakkaat oqaaseqarfigisinnaanagit nalunaarutigaa. Politiinit oqaatigineqarpoq, eqqumiitsuliortumut Thue Noahsenimut tunngasoq, eqqartuussivimmut angunneqarnissaa utaqqineqartoq. Aammalu suliaq politiiniitillugu arsaarinnissutaasimasut paasiniaanermi atorneqartussaallutik.
Suliaq naammassitinnagu Thue Noahsen susinnaanngilaq:
-Siunertarigaluaerpara ujaqqat silillugit sapangaliortarnissa, tassami ujaqqat kusanaqigamik. Eqqumiitsuliortoq oqarpoq.
Thue Noahsenip ujaqqat takoqqissinnaavai aatsaat pisoq eqqartuussivimmi suliarineqarlerpat