Rubinit pillugit isumaqatigiissut atsioqatigiissutigineqartoq
Pinnersaasiassamik rubinimik piiavissaq piffissami qanittumi aallartinneqassaaq misissuinerit isumaqatigiinniarnerillu ukiut arlaqartut ingerlanneqareersulllu.
Aatsitassarsiornissamut IBA-mik isumaqatigiissut siullerpaaq ualimut Qeqertarsuatsiaani atsiorneqarmat persuarsiorpalaartumik malunnartinneqarpoq.
Isumaqatigiissummik atsiortuupput Aatsitassaqarnermut Naalakkersuisoq Jens Erik Kirkegaard, Kommuneqarfik Sermersuup borgmesteria Asii Chemnitz Narup kiisalu aatsitassarsiorfiup True North Gemsip pisortaa, Bent Olsvig Jensen.
IBA-mi isumaqatigiissummi aalajangiisuuvoq piiaaviup sumiiffimmi sutigut iluaqutigineqarsinnaanera uanilu kommunimut taamatullu nunaqarfimmut Qeqersuatsiaanut iluaqutaasussat.
Kommeqarfik Sermersuup borgmesteriata Asii Chemnitz Narupip oqalugiarnermini erseqqissaatigaa Qeqertarsuatsiaat Kalaallit Nunaata oqaluttuarisaanerani pingaarutilimmik inissisimammat, tassami aalisakkanik tunitsivik siullerpaaq tassani pilersinneqarsimammat.
- Ullumikkut periarfissat assingusut periarfissaraasi. Siuuttuullusi nunatta sinneranut - nunarsuup sinneranut - takutissinnaavarsi, nunap iluani ujaqqat erlinnartuutit kisimik naassaassaanngitsut, aammali atugarissaarneq inuunermilu nalillit nassaassaasut, Asii Chemnitz Narup oqarpoq.
IBA-mik isumaqatigiissummi aatsitassarsiorfik True North Gems Greenland nunaqavissunik sulisoqarnissamik taamatulllu ilinniartitsinissamik pisussaaffilerneqarpoq.
Taakkua saniatigut Qeqertarsuatsiaani kulturikkut suliniutinik True North Gems aningaasatigut tapiissuteqartarniarpoq.
Rubinimik piiavissap sanaartorneqarnerani nunaqavissut ikinnerpaamik 70 procentiisa sulisorineqarnissaat anguniarneqarpoq, piiavillu ukiut pingasut ingerlareerpat nunaqavissut 80 procentiunissaat anguniagaalluni.
Tamakkua qulakkeerneqarnissaat aatsitassarsiorfiup True North Gemsip akueraa - rubinimik piaavissami sulisussat Kommeqarfik Sermersuup suliffissarsiuussisarfia aqqutigalugu sulisussarsiortoqartassasoq, tassuunatigut nunaqavissut sulisorineqarnissat qulakkerneqassammat.
Qeqertarsuatsiaani rubininik suliniutissaq pillugu innuttaasunik ullumi ataatsimiititsisoqassaaq
IBA-mik isumaqatigiissuteqarnermi aatsitassarsiorfiup ukiut tamaasa aningaasat 250.000 koruunit atorlugit piiavissami sulisussat ilinniartinneqarnissaannut atortassavai. Taakkua sanatigut ilinniartitsinernut 1 millionit koruunit ukiumut atorneqartassallutik.
Qeqertarsuatsiaani kulturikkut suliniutit rubinimik piiaanermit iluaquserneqartassaaq. Kulturikkut aningaasaaqarteqarfimmik pilersitsisoqassaaq nunaqarfimmi aaqqissuussanut tapiissuteqartoqartassalluni. True North Gems aningaasaateqarfimmut 100.000 koruuninik aallaqqaammut aningaasaliissaaq taakkualu 250.000 koruniusut amerliartortinneqassapput.
