Rubinisiortut silap naalagarsiortippai
Sila naalagaavoq. Canadamiut aatsitassarsioqatigiiffiata, True North Gems-ip, ullumikkut Qeqertarsuatsiaani ataatsimiititsinissaraluani taamaatiinnarpaa. Nittaallertarnera nuiaqarpallaarneralu pissutigalugit qulimiguulik ullumikkut nunaqarfimmut rubineqarfiusumukartussaq aallarsinnaanngilaq. Kisianni pisortaq aatsitassarsioqatigiiffimmilu siulittaasoq, Greg Fekete aqagumut qulimiguulimmik inniminniisimavoq silallu pitsaanerulernissaa neriuutigalugu. Sooq nunaqarfiliartariaqarnertik ima oqaluttuaraa:
- Ataatsimiititsinermi nunaqarfimmut attaveqarnerup ingerlatiinnarneqarnissaa pineqarpoq. Taamaalilluni kikkunnit tamanit susoqarnersoq ilisimaneqarniassammat. Iluarisarparput sulinitta aallartinnginnerani ataatsimiititsisarluta, pilersaarutivut tamanit ilisimaneqarniassammata, Greg Fekete oqarpoq.
True North Gems Qeqertarsuatsiaat eqqaanukaqqilerpoq qillerinissamut pilersaarut annertooq ingerlakkiartorlugu.
Pilersaarusiorneq ingerlanneqaleruttorpoq atortussallu atorneqartussat nunatsinnut nassiunnissaat piareerpoq.
Nunaqarfimmiunik ataatsimiititsinermi aammattaaq rubininik ujaqqanillu erlinnartunik tungujortunik ujaasinermut atatillugu sulinissamut periarfissat eqqartorneqassapput. Ukiormanna naatsorsuutigineqarpoq suliareqqitassat 60 tonsinik annertussuseqartut katersorneqarnissaat. Greg Fekete sulinissamut periarfissat pillugit ima oqarpoq:
- Atortussatta siumut utimullu assartornissaannut nunaqarfimmiunik atorfissaqartitsivugut, ininik unnuiffigineqarsinnaasunik pisariaqartitsivugut, aamma pinngitsoornata nerisartussaagatta igasunik pisariaqartitsivugut, ikiueqqaarnermik ingerlatsisinnaasut pisariaqartippavut, aamma qillerinermi ikiortit pisariaqartippavut kiisalu misissugassat assartornissaannut sulisussanik pisariaqartitsisussaavugut.
Aasamut aningaasartuutissatut missingersuutit 15 million koruuningajannik amerlassuseqarput. Aasamut pisussat suli aalajangersaqqissaarneqanngillat, kisianni naatsorsuutigineqarpoq Canadamiut immikkut ilisimasallit arfineq-marluk atorneqassasut nunaqarfimmiullu aqqaneq-marluk sulisorineqassasut.
- Maani nunaqavissunik sapinngisamik amerlanerpaanik sulisoqarnissaq siunertaraarput, tassa nunaqarfimmiut salliutillugit. Suliassat maanimiunit suliarineqarsinnaappata, taava tikisitsinissarput tunuarsimaarfigissavarput, Greg Fekete True North Gemsimeersoq oqarpoq.
Aatsitassarsioqatigiit Qeqertarsuatsiaat eqqaanni juunip 15-anni aallartinnissartik naatsorsuutigaat septembarillu naaneranut sulinissartik neriuutigalugu.
