Rubinisiornissaq sap. ak. uani tusarniaassutigineqassaaq
Tusarniaalluni ataatsimiisitsinerit Qeqertarsuatsiaani ataasinngorpat, Paamiuni marlunngorpat Nuummilu sisamanngorpat ingerlanneqassapput. Ataatsimiisitsinerit tamaasa nal. 19.00 aallartissapput, ataasinngornermi marlunngornermilu katersortarfinni pissallutik, Nuummilu sisamanngorpat Katuap inersuaaraani ingerlanneqassaaq.
-Tusarniaalluni ataatsimiisitsinerit najukkap siunissaanut tunngassuteqassapput, Naalakkersuisullu kissaatigaat anguniaralugulu aatsitassarsiornerup iluani ineriartortsinermi innuttaasut peqataatinneqarnissaat. Tusarniaalluni ataatsimiisitsinerni True North Gemsip suliniutissaanik, Qeqertarsuatsiaani, Paamiuni Nuummilu suliffissaqartitsiniarnikkut pitsaasunik periarfissiisussamik misissueqqissaarinerit, minnerunngitsumillu inuiaqatigiit aningaasaqarnerannut iluanaaruteqartitsisussaq pillugu saqqummiisoqassaaq, Inuussutissarsiornermut Avatangiisinullu naalakkersuisoq Jens-Erik Kirkegaard taama nalunaaruteqarpoq.
Tassunga ilanngullugu eqqaaneqassaaq, nalunaarusiat marluusut pillugit tusarniaaneq septembarip 12-iani 2013-imi nal. 12.00 killeqarmat. Tusarniaanermi atortussat www.naalakkersuisut.gl-imi nassaarineqarsinnaapput, tusarniaanermilu akissuteqaatit Aatsitassanut aqutsisoqarfimmut, postboks 930, 3900 Nuuk e-malikkulluunniit: bmp@nanoq.gl-imut nassiunneqassapput.