Rubinisiorfik neriulluartitsigaluartoq

True North Gemsip Aappaluttumi rubinisiorfissaa neriulluartitsigaluarpoq, siulersuisuisali akiliisinnaajunnaarnera ataasinngormat nalunaarutigaat.

 

Rubinisiornissaq ukiut pingasut matuma siorna neriulluartitsigaluarpoq.

 - True North Gemsip Qeqertarsuatsiaani ujarassiorfissaa tassaassagunarpoq, Nunatsinni aatsitassanut inatsisip nutaap atuutilerneraniit ujarassiorfinni ammarneqartuni siullersaajusussaq, True North Gemsip Aappaluttup kujataani innuttaasunut ataatsimiititsinerani radioaviisip tusagassiortuata Jonas Løvschall Wedelip tusagassiinera aallaavigalugu Katrine Kruse aggustip aqqaneq-aappaani 2013-imi taama tusagassiivoq.

Ingerlatseqatigiiffiulli akiliisinnaajunnaarnera ataasinngormat nalunaarutigineqarpoq.

- True North Gemsip ippassaq nalunaaqutaq ataatsip qeqqanut akiliisinnaajunnaartutut nalunaarutigineqarnera uppernarsarsinnaavara, True North Gemsilli pigisaanik akisussaasoq, Peter Schriver, marlunngormat KNR-imut oqarpoq.

Ingerlatseqatigiiffimmulli neriulluartoqarnikuugaluarpoq. True North Gems taamani aatsitassanut naalakkersuisorlu, Jens-Erik Kirkegaardilu marsimi 2013-imi isumaqatigiissummik atsiormata qilanaartoqaraluarpoq. 

- Imatut atsioqatigiinnerup avammut aningaasaliisartunut aatsitassarsiorusuttunullu oqariartuutaa pingaarutilerujussuuvoq, Jens-Erik Kirkegaard 2013-imi KNR-imut taama oqarpoq.

Suliniulli innuttaasunit taamani qularineqarpoq. 

Piniagassat qimaatinneqarnissaat, Nunatta peqquserluttoqarneranit akileraarutinik annaasaqarnissaa Nunattalu rubiniisa nunanut allanut aallarunneqarnissaat ilaatigut aarlerineqarput.

Taamannalli aarlerinninneq tunngavissaqanngitsoq, True North Gemsimit oqaatigineqarpoq, ingerlatseqatigiiffiullu Nunatsinni akileraartarnissaa neriorsuutigineqarluni.

 

Aamma atuaruk TNGG 100 millionit koruuninik amigaateqarluni akiliisinnaajunnaartoq

 

Qularneq

Qulartorpassuillu allamik isumaqaleriartorput.

Nunatta Karsia 300 millionit koruunit 350 millionit koruunillu akornanni True North Gemsip akileraarutaaniit isertitaqarsinnaanissaa True North Gemsimit neriuutigineqartoq oqaatigineqarpoq.

Isertitsissutaasussallu politikerinit iluarisimaarneqarput.

IBA-millu isumaqatigiissuteqartoqarnera pissutigalugu Qeqertarsuatsiaat aningaasanik 100 tuusintilikkuutaanik isumaginninnermut kulturimullu atugassanik tunineqartussanngornera, rubinisiortussanngornermilu suliffinnik pilersitsisoqartussanngornera ilaatigut pissutigalugit innuttaasut qularunnaariartorput. 

Taakkuli maannamut neriuutaagallaannaapput, True North Gemsimmi aningaasaqarniarnikkut ajornartorsiorneq pissutigalugu aasaq manna soraarsitsisalerpoq.

 - Massakkut aningaasassaqanngikkutta inuit sulitiinnarsinnaanngilagut, Jens B. Frederiksen juulip qaammataani KNR-imut oqarpoq.
True North Gemsilu maanna akiliisinnaajunnaartoq tassa nalunaarutigineqareerpoq.

 

Aamma atuaruk Randi Vestergaard: Tusagaq ajuusaarnartorujussuuvoq

 



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl