Rubininik piiaavissaq pillugu IBA-mik isumaqatigiissut ima imaqarpoq

IBA-mik isumaqatigiissummi inuiaqatigiinnut, aningaasaqarnikkut aamma avatangiisitigut piujuartitsisumik Kalaallit Nunaani piiaaveqalernissaa qulakkeerniarneqarpoq.

Kalaallit sulisartut sulisorineqarnissaat isumaqatigiissummi qitiutilluinnarneqarput.

True North Gems Greenlandimit ersarissumik nalunaarutigineqarpoq, sulisartut aatsitassanik piiaavimmi sulisorineqartussatut pisariaqartinneqartut 75 procentii kalaaliussasut. Tamatumalu saniatigut tallimanik ilinniartuuteqartuassallutik.

Suliffeqarfiup ukiuni 2014-imi aamma 2015-imi aningaasat 250.000 koruunit ilinniartitsinermut aningaasaateqarfimmut immikkoortissavai, tassani sulisartut ilinniagaqarsimasut ilinniagaqarsimanngitsullu aatsitassarsiornermut tunngasuni suliffinnik soqutigisaqartut pikkorissarnissaat qulakkeerniassallugu. True North Gems Greenlandillu 2016-imiit aatsitassarsiorfiup matuneqarnissaata tungaanut ilinniartitsinermut aningaasaateqarfimmut ukiumut 1 million koruunit immikkoortittassavai.

AAMMA ATUARUK Rubinit pillugit isumaqatigiissut atsioqatigiissutigineqartoq

Inuussutissarsiornermut Aatsitassanullu Naalakkersuisup Jens-Erik Kirkegaardip isumaqatigiissutip Qeqertarsuatsiaani innuttaasunit tapersersorneqarnissaa pingaartippaa.

True North Gems aamma isumaginninnikkut kulturikkullu suliniutinut atugassanik aningaasanik immikkoortitsivoq. Ukioq manna aappaagulu ukiumut 100.000 koruunit immikkoortinneqassapput. 2016-miillu ukiumut 250.000 koruunut qaffassallutik.

Isumaqatigiissummi IBA-mi aamma pineqarput nunaqarfimmi silisinermut atortorissaarutit pilersinneqaqqinnissaat, aammalu pinnersaasiassanik agguinermik silisinermillu pikkorissarnerit aaqqissuunneqassapput.

Oqaatigineqareersutut IBA-mik isumaqatigiissut maannamiit oqaatsit pingasut atorlugit atuarneqarsinnaavoq uani www.naalakkersuisut.gl.