Rubinimik anngajaamik isumallualersitsisumik nassaartoqarpoq

Canadamiut suliffeqarfiat True North Gems Qeqertarsuatsiaat eqqaani ujaqqanik erlinnartunik rubininik ilaatigut qulimiguulik atorlugu angalasarluni misissuivoq. Misissuisut kalaallinik marlunnik sulisoqarput, taakkulu aappaat rubinit nassaarineqarsimasut annersaannik aasaq manna nassaartuusimavoq. Thue Noahsenip nassaani pillugu ima oqarpoq:

- Inussanik marlunnik angissuseqarpoq. Qaqqamiippoq, tiffasissumi. Qaarsup qaavani anillangalluni, arfinilinnik sikkeqarpoq. Nassaarigakku nuannaaqaanga nipituumillu nillersimagunarama ujaaseqatimma ornipallappaannga. Thue Noahsen oqarpoq.

Rubinisiortut nuna pilattorlugu ujarlertarput, misissuinermi nunamik sajuppillatsitsisarneq atortorineqanngilaq – ujarak pinnersaasiassaq qulloorsinnaammat. Nuna ukioq manna annertuumik nassaarfiusoq qaartiteriffigineqarsimanngilaq allanngortinneqanngingassimallunilu.

Thue Noahsenip nassaani piumaffigineqarnermisut kalaallisut atserpaa, taaguuteqalerporlu: Aappaluttoq.

Aappaluttoq qanoq akeqassanersoq suli nalunarpoq. Canadamiut suliffeqarfiat True North Gems Qeqertarsuatsiaat eqqaanni nunap immikkoortuini sisamani misissuivoq, Canadamiullu ukiut arlaqanngitsut qaangiuppata piiaavinnik pingasunik suliffissanillu 30-t 50-illu akornanni amerlassusilinnik pilersitsisinnaanissatik naatsorsuutigaat.

Qeqertarsuatsiaani innuttaasut katillugit 252-iupput.