Rubin Qeqertarsuatsiaaneersoq pinnersaasiarineqartoq

Rubinerujussuaq Qeqertarsuatsiaat eqqaanni Kitaani siorna nassaarineqartoq maanna canadamiup pinnersaasiortartup pinnersaasiareereerpaa. Tamatumamita kingorna qanoq pisoqassava?

Canadamiut aligoqqinnik piiaaviutaat, True North Gems, Qeqertarsuatsiaat eqqaani rubininik piaavoq, rubini siorna nassaarineqartoq ikinnerpaamik 2,6 million koruuninik naleqassangatinneqarpoq.

Piiaaviup pisortaata Nick Houghtonip rubiini nunatsineersoq tupinnarnerarpaa:

- Rubinip qanoq ilusilersorneqarnissi soorlu nammineq aalajangertaraa. Golfertartut arsaaraat mikissunngorlugu takorlooraanni rubini qanoq angitiginersoq takorloorneqarsinnaavoq, Nick Houghton oqarpoq.

Rubini 60 gramit missaanni oqimaatigaaq nunarsuarmilu pinnersaasiortartut nuimasut ilaata, Thomas McPheep, ukioq ilivitsugajak atorlugu nunat avannarliit kalaallillu oqaluttuatoqaatai takorlooruminartunngorlugit mikisuararsuarnik tupinnartunilu pinnersaasiorpoq.

Pinnersaasiammita maanna qanoq pineqassappat?

- Rubini atorlugu Kalaallit Nunaat, nunat avannarliit piiaavippullu avammut nittarsaatissavagut. Rubinit uumatut ittut ullutsinni akuttusoorujussuupput, amerlanertigullu nunani nalaakkersuinermik ajornartorsiortuni anngortumillu annissuiffiusuni, soorlu Burmami, nassaarineqartarlutik – Kalaallit Nunaanni aaqqissuulluakkami rubinimik nassaarneq piiaaviinnit allanit soqutigineqarluarsinnaavoq. Rubini tunineqassanngikkallarpoq nittarsaassinermili atorneqassalluni, Nick Houghton oqarpoq nangillunilu:

- Qeqertarsuatsiaat eqqaani rubinimik nassaarneq aallarniutaaginnarpoq. Itinerusoq suli piiaavigineqanngilaq suullu nassaarineqarsinnaaneri eqqarsaatigiinnarlugit qiiaammisarpunga, Canadamiut aligoqqinnik piiaavianni pisortaq taama naggasiivoq.

Rubinit pinnersaasiarineqarsimasut assingi nittartakkatsinni www.knr.gl-imi takusinnaavatit, aligoqqinnik piiaviup nittartagaa nittartakkatsinnut aamma atassuserneqarnikuuvoq.