"Rubin" Qasigiannguani suliunnaarsitsinermut peqqutaaqataavoq
- Taamaliorneq annilaarutigaara. Royal Greenlandip taamatut soraarsitseriataarnera pissusissamisuunngitsutut isigaara, Jess Svane oqarpoq.
Qasigiannguani sulisut 36-it suliunnaarsinneqarnerinut nalimmassaaneq fabrikkip ittuanit tunngavigitinneqarpoq.
- Tassunga peqqutaavoq tunisassiat tunerarneqartut ima ikitsigilersimammata inunnik taama amerlatigisunik tunisassiorfik pisariaqartitsiunnaarsimavoq, Martin Didriksen Qasigiannguani fabrikkip ittua oqarpoq. Suliunnaarsitsinerli Jess Svanep akuersaanngilaa.
- Una eqqaamasariaqarparput suliffeqarfik Kalaallit Nunaata naalagaaffiata pigivaa. Inuit taamatut pinnguarineqartutut isikkulerlugit Royal Greelandip suliffeqarfiutaani aammalu allanik pigisaanik taamatut pineqaqattaarneq akuersaarneqarsinnaanngilaq, Jess Svane oqarpoq.
Qasigiannguani suliunnaarsitsineq ataasinngorpat sulisunut tamakkiisumik atuutsinneqalissaaq.
- Tassa ilumoorpoq ataasinngopat sulisoqassanngilaq, ataasinngorpat tunisassiassaatissaqanngilagut, taamaammallu sulisut tamarmik sulissanngillat, Martin Didriksen oqarpoq, tamannalu Halibut Greenlandip Ilulissat eqqaani umiarsualiinerata kingunerivaa.
- Ulluni makkunani aalisartut pisarnermittut oqaloqatiginninnerat malillugit Ilulissani aalisaraluarput, kisianni pisarisartagaat ikileriarsimasut malugivagut. Nalinginnaasumik aalisarnerit ingerlagaluarput, kisianni ataasinngorpamiit suliassaqannginnitsinnut aamma peqqutaasut ilagivaat aleralinnik tunitsivik Halibut Greenlandimit pigineqartoq taakku massakkut inissikkallarnikuuvoq
Qaasuitsup kommuniani borgmesterip tamanna nassuiaatissatut ilumoornersoq apeqquserpaa.
-Unammillernimininnguaq tunngavigalugu suliffeqarfik suliunnaarsitsisinnaanngilaq. Jess Svane oqarpoq.