Royal Run: Kunngissaq pillugu Nuummi juunip arfernani arpattoqassaaq
Nuummi Royal Run-mik aaqqissuisut neriuutigilluinnarpaat juunip arfernat silagissasoq
Ullormi taanna Royal Run isorartussutsinut assigiinngitsunut arpannerusoq pisussaavoq aamma kiateeqqat 1.000-it nalunaartut siulliit 1.000-it pissaat naqitereerput aammalu peqataasut ujaminnassallutik.
AAMMA ATUARUK Royal Run kommer til Nuuk
Unamminerussanngilarli nalliuttorsioqatigiinnerussalluni nuannersumik ataatsimoorneq kissaatini salliutinneqassalluni.
- Unammisoqassanngilaq. Piffissalersuisoqarnavianngilaq. Piffissalersorusuttut nammineq tamanna isumagissavaat, Nuummi Royal Runimik ataqatigiissaarisoq Christina Christensen KNR-mut oqarpoq.
- Peqaataanissaq pingaarnersaavoq aammalu arpannermi nuannisarnikkut misigalugu arpanneq ataatsimoorfiusinnaasoq, Christina Christensen oqarpoq.
Tusarnaartitsineq qitillu
Nalliuttorsiorpalaarnerup ilisarnaatigiumaarpaat arpaffimmi sumiiffinni arlalinni aliikkusersuisoqassammat. Arpaffik takineq arsaaffimmiit naluttarfiup Maliup nerngallagiaanut ingerlassaaq. Nipilersortoqassaaq, kalattoortoqarluni, illersuisut qittatissallutik aammalu assigiinngitsutigut aliikkusersuisoqassalluni.
Taamaattumik aaqqissuisut kissaatigilluinnarpaat ulloq taanna silagilluarumaartoq.
- Ulloq taanna sila pitsaavallaanngeriataassappat arpannerinnaassasoq ilimanarpoq, Christina Christensen oqarpoq.
Eqqaaneqareersutut nalunaartut siulliit 1.000-it kiateerassaqarput sulili amerlanerusut peqataanissaat neriuutigineqarpoq.
- Naatsorsuutigaarput 1.000-it missaat takkutissatut kiateeqqat ujammillu 1.000-it piareersimasussaammata. Aammali neriuutigaarput suli amerlanerit takkussorumaartut nalliuttorsiorpalaarnerussagatta, Christina Christensen oqarpoq.
Kunngissaq tikissanngilaq
Kunngissarli nammineq Nuummut tikinnavianngilaq. Ulloq taanna Danmarkimi arpassagami Royal Run Aalborgimi, Aarhusimi, Koldingimi, Næstvedimi, København/Frederiksbergimi kiisalu Bornholmimi juunip arfernat arpattoqassammat.
AAMMA ATUARUK Royal Run coronamik ajornartoornerup kingunerisaanik unitsinneqartoq
Royal Run siullerpaamik 2018-mi Danmarkimi pivoq Kunngissaq Frederiup 50-liinera malunnartinniarlugu pimmat.
2020-mi Nunatsinni siullerpaamik pisussaagaluarpoq - coronali pissutigalugu taamaatinneqarpoq.
Siorna aamma taama pisoqarpoq.
