Royal Greenlandip Uummannami suliffissuani tunisassioqqilersut
Uummannami aalisartut Royal Greenlandip aalisakkanik tunisassiorfianut tunisaqaqqilersinnaaleramik nuannaarutigaat.
Tamanna pisinnaalerpoq tunisassiorfik annertuumik nutarterneqareermat allilerneqarlunilu.
Allattoq Inge S. Rasmussen
apriilip 05-at 2017 09:36
Nutserisoq Jaaku Lyberth
Tunisassiorfik qaammatini qulingiluani matoqqavoq, taamaannerani allilerneqarpoq teknikikkullu atortunik nutaanik ikkussivigineqarluni, Royal Greenland nittartakkamini taama allaaserisaqarpoq.
Tunisassiorfik aalisakkanik amerlanerusunik tunisassioqqissinnaaleraluartoq suli ajornartorsiuteqarpoq.
Tassami tunisassiorfik sulisussaaleqivoq, sulisussaaleqinerlu anigorniarlugu sulisussanik pingasunik nunaqarfiit ilaannit sulisussarsisoqaraluarpoq.
- Tunisassiorfimmi sulisunik amerlanerusunik atorfissaqartitsivugut, Royal Greenlandip tunisassiorfiani Uummannamiittumi aqutsisoq Kirsten Nielsen Jensen oqarpoq.
Tunisassiorfiup allilerneqarluni matoqqanerata nalaani aalisartut umiarsuarnut tunitsiviusunut assigiinngitsunut marlunnut tunisisarput.