Royal Greenlandip sulisussanik amigaateqartarneq qaangerusuppaa
Uummannami, Paamiuni Qasigiannguanilu sulisussaaleqisoqarpoq. Uummannami 25-t, Paamiuni 35-t aammalu Qasigiannguanilu 25-t. Sulisussaaleqisarneq qaangerniarlugu Royal Greenland suleqatigiissitanik ukiormanna pilersitsivoq, suleqatigiissitallu ilaatigut akilersinnaanerusumik ingerlatsinissamut missingersuusiornissamik suliakkerneqarput.
- Aasaanerani tikisitat amerlanersaat aasaq manna uatsinni sulisimasut ajoraluartumik sulinermik sungiusimasaqanngillaq, taamaammat suleqatigiisitami naliliivugut ingerlariaqqittariaqarluta misissorlugulu, pitsaanerusumik tunisassiorsinnaanissamut aammalu Naalakkersuisut ataavarnerusumik tunisassiortoqarnissaanik kissaataannut naapertuuttumik periarfissat suut aallartissinnaanerlutigit. Sulisussanik amigaateqartarneq qaangerneqarluinnartariaqalerpoq, Søren Olsen Damgaard, Sulisoqarnermi Pikkorissaasarnermilu Ingerlatsisoq oqarpoq.
Suliffissaaleqisut pillugit kisitsisitigut paasissutissat qissimikkaanni takuneqarsinnaavoq Qasigiannguani suliffissaaleqisut 66-iusut, Uummannami 71-it Paamiunilu 105-it, taamaammat atorfiit inuttalernissaat ajornartorsiutaasussaanngikkaluarpoq, piviusorli kisitsisinut naleqqiullugu allarluinnaavoq.
- Najugaqarfinni sulisunik amigaateqarfitsinni suliffissaaleqisoqangaatsiarpoq, kisianni sumiiffinni atorfinitsitsigaangatta ineriartornissamut ajoraluartumik aporfiunerpaasarpoq suliffimmik paarsilluarsinnaasannginneq, taamaammat periarfissat allat qissimigaalerpagut, soorlu avataanit tikisitsisinnaaneq, Søren Olsen Damgaard oqarpoq.