Royal Greenlandip siulersuisuini siulittaasunngorpoq
Royal Greenlandip siulersuisuisa pisortaasalu immikkut ittumik ataatsimeersuarnerat ulloqeqqata siorna aqqanernut aallartippoq. Ataatsimeersuarnermik aammaavoq Royal Greenlandip pisortaanera Keld Askær, oqaluuserisassat marluk eqqartorneqarput, tassalu siulittaasussarsiorneq oqaluuserisassallu allat.
Ataatsimeersuarneq minutsinik 15-inik sivisussuseqarpoq. Royal Greenlandip siulersuisuini siulitaasussatut toqqarneqarpoq KNAPK-ip pisortaa 46-inik ukiulik Paaviaaraq Heilmann. Siulitaasussatut toqqagaanerminut atatillugu oqalugiarnermini Paaviaraq Heilmann-ip oqaatigaa KNAPK-imi pisortatut tunuarnissi aalajangiusimallugu, qaqugorpiarli pinissaa erseqqissumik ullulinngilaa, taamaattorli oqaatigalugu tamanna ulluni qaninnerni piumaartoq. Pisortatut tunuarluni siulersuisuni siulittaasumut ikaarsaariarnermini akissaatini pillugit qanoq aaqqiissuteqartoqarnissaanik Royal Greenlandimik piginnittut KNAPK-lu ulluni qaninnerni aaqqiissuteqassasut oqaatigaa:
- Tassami Royal Greenlandip siulersuisuini siulittaasoq ukiumut taamaallaat 150.000 kronenik akissaateqartinneqarpoq.
Royal Greenlandip siulersuisuini siulittaasunngornermini anguniagassatut pingaarnertut, suliffeqarfimmik aqutsisut, piginnittut, pilersuisut, pisisartut, sulisullu akornanni pitsaasumik tatigeqatigiinnerlu tunngavigalugu ingerlatsilernissaa Paaviaaraq Heilmann-ip anguniarumavaa.
Ryoal Greenlandip immikkut ittumik ataatsimeersuarnerani, siulersuisuni ilaasortat allanngunngillat, siulittaasulli tullia ulluni qaninnerni toqqarneqassaaq.
Royal Greenlandip ataatsimeersuarnerani piginnittunit Inuussutissarsiornermut Naalakkersuisoq Johan Lund Olsen Namminersornerlu pillugu Naalakkersuisoq Jørgen Wæver Johansen, pisortaaneq Keld Askær, pisortaq Henrik Leth kiisalu siulersuisuni ilaasortat Martin Ben Shalmi aamma Finn Meinel ornigullutik peqataapput.
Nunatsiniinnaq Royal Greenland maannakkorpiaq malittarineqarluarnianngilaq, danskit aviisianni Berlingske Tidendemi aamma allaaserineqarpoq nunarsuarmiut aningaaseriviisa Royal Greenlandip ineriartornera naalaaserlutik malittarigaat.
