Royal Greenlandip Sisimiuni suliffissua sakkortuumik isornartorsiorneqarpoq
Royal Greenlandip taamatut aalajangiisimanera saattuarniat akuersaarsinnaanngilluinnarpaat. Sisimiunni Maniitsullu akornanni ukiakkut imarluttaqaat aalisartullu allaat inuunertik navianartorsiortillugu taama ungasitsigisumut ingerlasinnaannginnerarlugit.
- Sisimiut nunaqarfiini tunitsiviit ingerlanngillat, naak saarulleqarluaraluartoq, kingullertigullu Royal Greenland A/S taakku pillugit pilersaarumminik nalunaaruteqanngilaq. Sisimiuni aalisartut pissutsit taamaattut qatsulluinnarlugit akuersaarsinnaanngilaat, Sisimiummi eqqaat assigiinngitsunik atorluarneqanngitsunik aalisagarpassuaqarmat, Adam Dahl, Sisimiuni Aalisartut Piniartullu Peqatigiiffianni siulittaasoq nassuiaavoq.
Aalisartut piniartullu peqatigiiffiata borgmesteri kommunalbestyrelsilu kajumissaarpaat saattuarnianut atugassarititaasut iluarsineqarnissaannut piumasaqarlutik akuleruteqqullugit. Taamatummi pisoqanngippat SAPP-p aarleqqutigaa Sisimiut aalisartoqarfittut siunissaa ulorianartorsiortinneqalissasoq. Aammattaaq Sisimiormiut namminneq aalisakkanik tamanik tigooraasumik tunisassiorfimmik pilersitsinissannik siunnersuuteqarput.
